शुभांरभ का बाद अल्मोड़ा नी पौंछि हेली सेवा: मुख्यमंत्री पुष्कर सिंह धामी न आज जौलीग्रांट हवाई अड्डा बटी देहरादून बटी अल्मोड़ा, पिथौरागढ़ थै लेकी हेली सेवा कु शुभारंभ करी. देहरादून बटी उड़ान भन्ना बाद ई हेली सेवा थै नैनीताल मा मौसम खराब होंण का कारण कैंसिल कन्न पड़ी, ज्या का कारण अल्मोड़ा का हैलापैड में सभी तैयारी धरी की धरी रै गिन्न, ये दौरान लोग काफी मायूस नजर ऐन. बथै द्या अबी डीजीसीए न हेली सेवा थै हफ्ता ना एक दिन चलौणै अनुमति दियी च.
AIIMS ऋषिकेश मा पीआईसीयू कु शुभारंभ: मुख्यमंत्री पुष्कर सिंह धामी न आज AIIMS ऋषिकेश मा पीआईसीयू कु शुभारंभ करी. ये मौका पर सीएम धामी न अस्पताल कु निरीक्षण भी करी. दगड़ा मा ही ऊंन मरीजूं कु हालचाल भी जांणी. ये दौरान सीएम धामी न बोली उत्तराखंड राज्य का दगड़ी ही अन्य राज्यों थै एम्स ऋषिकेश एक वरदान का रूप मा काम कन्नू च. अब पीआईसीयू का शुभारंभ से छोटा बच्चों थै भी यख अच्छी स्वास्थ्य सुविधा मिल सकली.
फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च
धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
जल्द होलू खिलाड़ी उद्यमान योजना कु शुभारंभ: खेल मंत्री रेखा आर्य न आगामी 29 अगस्त राष्ट्रीय खेल दिवस की तैयारियूं थै लेकी खेल विभाग का अधिकारियूं दगड़ि समीक्षा बैठक करी. या बैठक रेखा आर्य का यमुना कॉलोनी स्थित शासकीय आवास पर ह्वे. बैठक मा खेल मंत्री रेखा आर्य न बथै की 29 अगस्तौ राष्ट्रीय खेल दिवस का मौके पर 8 से 14 वर्ष तक का बच्चों थै मुख्यमंत्री खिलाड़ी उदयमान योजना कु शुभारंभ करला. या का तहत बच्चों थै 1500 रुप्या की खेल छात्रवृत्ति प्रदान किये जाली.
लालतप्पड़ क्षेत्र मा तीन शव बरामद: देहरादून का लालतप्पड़ चौकी क्षेत्र मा नदी का पास तीन शव मिन्न से हड़कंप मच गी. सौंग नदी मा भी एक महिला कु शव बरामद करे गी. शवै शिनाख्त नी ह्वे. घटना की जानकारी का बाद SDRF डीप डाइविंग टीम, घटनास्थलौ रवाना ह्वे. आशंका जतये जांणी च की यू शव आपदा मा लापता लोखूं का ह्ववे सकदन, बहरहाल प्रशासन न यां का पुष्टि नी करी, छानबीन का बाद ही स्थिति स्पष्ट होली.
देहरादून मा नवजातै सिर कटी लाश: देहरादून मसूरी रोड पर एक नवजातै सिर कटी लाश मिली. ज्या का बाद पूरा इलाका मा सनसनी फैल गी. लोखूं न मामलै जानकारी पुलिस थै दिनी. ज्या का बाद मौका पर पौंछि पुलिस न शव थै कब्जा मा लेकी पोस्टमॉर्टमौ भेजी . घटना की जानकारी का बाद उच्च अधिकारी भी मौके पर पौंछिन. फिलहाल पुलिस आसपास लग्यां सीसीटीवी फुटेज थै चेक करी सबूत जुटौण मा लगी च. दगड़ा मा ही आसपास का हॉस्पिटलूं मा भी बच्चा का बारा मेा जानकारी जुटये जांणी च.
अल्मोड़ा जिला अस्पताल मा शराबी डॉक्टर: अल्मोड़ा जिला अस्पतालै इमरजेंसी मा तैनात डॉक्टर नशा मा धुत मिली. ये इस दौरान डॉक्टर न इलाज करौंण अयां लोखूं दगड़ी भी अभद्रता करी. अब ये मामला मा प्रभारी स्वास्थ्य सचिव डॉ आर राजेश कुमार न संज्ञान लिनी. ऊंन ये मामला मा प्रमुख चिकित्सा अधीक्षक थै तीन दिन का भीतर स्पष्टीकरण देणौ बोली. वखी, नशा मा धुत डॉक्टरो वीडियो सोशल मीडिया मा भी काफी वायरल होंणू च.
पांच सितंबर बटी केदारनाथै तीसरा चरणै यात्रा शुरू: प्रदेश मा केदारनाथ यात्रा कु पैलू और दूसरू चरण पूरू ह्वे गी. पैला चरणै यात्रा मई और जून मैना मा ह्वे. या मा लगभग नौ लाख तीर्थ यात्री केदारनाथ धाम पौंछिन. जबकि, दूसरा चरणै यात्रा जुलाई और अगस्त मैना मा ह्वे. या मा अब तक एक लाख से ज्यादा भक्त केदारनाथ पौंछिन. अब प्रशासन केदारनाथ यात्रा का तीसरा चरणै तैयारियूं मा जुट गी. पांच सितंबर से केदारनाथै तीसरा चरणै यात्रा शुरू होली. मौसम खुन्ना बाद केदारनाथ थै हेली सेवाऊं कु संचालन भी पांच सितंबर बटी दोबारा शुरू किये जालू.
