मध्य क्षेत्रीय परिषदै बैठक मा सीएम धामी: मध्य प्रदेश का भोपाल मा आज मध्य क्षेत्रीय परिषदै 23वीं बैठक ह्वे. ज्या मा मुख्यमंत्री पुष्कर सिंह धामी न भी शिरकत करी. ई बैठक मा सीएम धामी न वित्तीय संसाधनूं का आवंटन मा फ्लोटिंग पॉपुलेशनौ ध्यान रखणौ अनुरोध करी. दगड़ा मा ही सीएम धामी मध्य क्षेत्रीय परिषदै आगामी बैठक उत्तराखंड मा आयोजित करौणौ अनुरोध भी करी. बथै द्या मध्य क्षेत्रीय परिषदै बैठक मा मध्य प्रदेश, उत्तर प्रदेश, उत्तराखंड और छत्तीसगढ़ का मुख्यमंत्री शामिल ह्वेन.
सड़क हादसों मा घायल लोखू कु फ्री इलाज कराली सरकार:उधमसिंह नगर जिला का काशीपुर मा आज होम्योपैथी पर राष्ट्रीय सेमिनार कु आयोजन करे गी. ये सेमिनार मा देशभर का सैकड़ों डॉक्टरुं न प्रतिभाग करी. राष्ट्रीय सेमिनार मा उत्तराखंड का स्वास्थ्य मंत्री धन सिंह रावत न मुख्य अतिथि का तौर पर शिरकत करी. ये दौरान स्वास्थ्य मंत्री धन सिंह रावत न कई बड़ी घोषणा करीन. स्वास्थ्य मंत्री न बोली सड़क हादसौं मा घायल होंण वाला लोखूं कु जल्द ही उत्तराखंड मा फ्री इलाज किये जालू.
पेपर लीक मामला मा आक्रामक कांग्रेस:कांग्रेस ने UKSSSC पेपर लीक मामलै जांच सीबीआई से करौणै मांग करी. उपनेता प्रतिपक्ष भुवन कापड़ी न UKSSSC पेपर लीक मामला थै मध्य प्रदेश का व्यापमं घोटाला से बड़ू घोटाला बथै. यां का दगड़ा ही उपनेता प्रतिपक्ष भुवन कापड़ी न पेपर लीक मामला मा UKSSSC का पूर्व अध्यक्ष एस राजू और सचिव संतोष बडोनी का खिलाफ भी कड़ी कार्रवाई कन्नै मांग करी.
पेपर लीक मामला मा आप कु प्रदर्शन : UKSSSC पेपर लीक मामला मा आम आदमी पार्टी भी एक्शन मा च. आज पेपर लीक मामला थै लेकी आम आदमी पार्टी का कार्यकर्ताऊं न प्रदेशभर में विरोध प्रदर्शन करी. ये दौरान प्रदर्शनकारी कार्यकर्ताऊं न राज्य सरकार का खिलाफ जमकर नारेबाजी करी. आम आदमी पार्टी न भी पेपर लीक मामलै जांच सीबीआई या हाईकोर्ट का जज से करौणै मांग करी.
पौड़ी एसडीएम विवाद पर कांग्रेस कु हल्ला बोल: पौड़ी तहसील मा युवा कांग्रेस नेता और एसडीएम सदर कु बीच कु विवाद राष्ट्रीय स्तर पर पौछ गी. आज ये मामला मा कांग्रेस न हल्ला बोली. कांग्रेस ने ये मामला मा आज गांधी पार्क मा धरना दिनी. कांग्रेस राष्ट्रीय मीडिया प्रमुख, पूर्व सीएम, पूर्व प्रदेश अध्यक्ष सहित अनेक नेताऊं न एसडीएम का खिलाफ कार्रवाई की मांग करी. भाकपा माले का गढ़वाल सचिव न भी एसडीएम का व्यवहार थै आपत्तिजनक बथै.
फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च
धामी कैबिनेट विस्तारै चर्चा शुरू:उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
जल्द होलू खिलाड़ी उद्यमान योजना कु शुभारंभ:खेल मंत्री रेखा आर्य न आगामी 29 अगस्त राष्ट्रीय खेल दिवस की तैयारियूं थै लेकी खेल विभाग का अधिकारियूं दगड़ि समीक्षा बैठक करी. या बैठक रेखा आर्य का यमुना कॉलोनी स्थित शासकीय आवास पर ह्वे. बैठक मा खेल मंत्री रेखा आर्य न बथै की 29 अगस्तौ राष्ट्रीय खेल दिवस का मौके पर 8 से 14 वर्ष तक का बच्चों थै मुख्यमंत्री खिलाड़ी उदयमान योजना कु शुभारंभ करला. या का तहत बच्चों थै 1500 रुप्या की खेल छात्रवृत्ति प्रदान किये जाली.
बौर जलाशय मा होली राष्ट्रीय कयाकिंग कैनोइंग प्रतियोगिता: गूलरभोज स्थित बौर जलाशय मा 33 वीं राष्ट्रीय कयाकिंग कैनोइंग प्रतियोगिता कु आयोजन किये जालू. या प्रतियोगिता 22 से 25 अगस्त तक चलली. प्रतियोगिता थै लेकी प्रशासन न लगभग सभी तैयारी पूरी करेनी. ई कयाकिंग कैनोइंग प्रतियोगिता मा देशभर का 24 राज्यूं का लगभग 80 खिलाड़ी प्रतिभाग करला. कार्यक्रम का शुभारंभ थै लेकी सीएम धामी थै भी आमंत्रण पत्र भेजे गी.
पांच सितंबर बटी केदारनाथै तीसरा चरणै यात्रा शुरू: प्रदेश मा केदारनाथ यात्रा कु पैलू और दूसरू चरण पूरू ह्वे गी. पैला चरणै यात्रा मई और जून मैना मा ह्वे. या मा लगभग नौ लाख तीर्थ यात्री केदारनाथ धाम पौंछिन. जबकि, दूसरा चरणै यात्रा जुलाई और अगस्त मैना मा ह्वे. या मा अब तक एक लाख से ज्यादा भक्त केदारनाथ पौंछिन. अब प्रशासन केदारनाथ यात्रा का तीसरा चरणै तैयारियूं मा जुट गी. पांच सितंबर से केदारनाथै तीसरा चरणै यात्रा शुरू होली. मौसम खुन्ना बाद केदारनाथ थै हेली सेवाऊं कु संचालन भी पांच सितंबर बटी दोबारा शुरू किये जालू.
