राष्ट्रपति चुनाव थै लेकी प्रशिक्षण: उत्तराखंड मा भाजपा न राष्ट्रपति चुनाव थै लेकी तैयारी शुरू करेन. ई कड़ी मा आज भाजपा न राष्ट्रपति चुनाव मा मतदान कन्ना वाला पदाधिकारियूं थै कार्यशाला कु आयोजन करी. कार्यशाला मा संसदीय कार्यमंत्री प्रेमचंद्र अग्रवाल न सब्यूं थै मतदान थै लेकी जानकारी दिनी. ई कार्यशाला मा भाजपा का 47 विधायकूं का दगड़ा ही बसपा का द्वी और निर्दलीय विधायक भी मौजूद रैन.
आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.
काशीपुर मा होलू भाजपा कु प्रशिक्षण शिविर:भाजपा प्रदेश अध्यक्ष मदन कौशिक न संगठन का कार्यक्रमूं की जानकारी दिनी. ऊंन बथै 19 से 21 जुलाई तक भाजपा प्रदेश प्रशिक्षण शिविर का आयोजन काशीपुर मा किये जालू. यां कु थै लेकी संगठनै ओर से तैयारी तेज ह्वे गीन. मदन कौशिक न बोली ये प्रशिक्षण शिविर का आयोजन थै लेकी अच्छा कार्यकर्ताऊं थै जल्द ही दायित्व दिये जालू.
उत्तराखंड कांग्रेसै अहम बैठक: उत्तराखंड कांग्रेस का प्रदेश प्रभारी देवेंद्र यादव आज देहरादून पौंछिन. जख ऊंन अग्रिम रणनीति कु मसौदा तैयार कन्नौ पार्टी का सभी जिलाध्यक्ष, महानगर अध्यक्ष, अनुषांगिक संगठनूं और प्रकोष्ठूं का प्रदेश अध्यक्षूं दगड़ी बैठक करी. ये दौरान देवेंद्र यादव न पार्टी नेताऊं की नाराजगी पर साफ तौर से इनकार करी. ई बैठक मा राष्ट्रपति चुनाव, महंगाई, बेरोजगारी जन मुद्दों पर विस्तार से चर्चा करे गी, दगड़ा मा ही रणनीति भी बणये गी.
पीसीएस अफसरुं थै प्रमोट कन्न पर मुहर: उत्तराखंड मा पीसीएस अफसरुं का प्रमोशन पर पब्लिक सर्विस कमीशनै मुहर लग गी. खबर का अनुसार राज्य मा 18 पीसीएस अफसर लंबा समय से आईएएस बणणौ इंतजार कन्ना छन. ज्या पर संघ लोक सेवा आयोगै बैठक ह्वे गी, अब ये मामला मा डीपीसी ह्वे गी, अब जल्द ही यू पीसीएस अफसर प्रमोट ह्वे सकला. पीसीएस अफसरुं की ई लिस्ट मा उमेश नारायण पांडे, उदय राज सिंह, राजेंद्र कुमार, योगेंद्र यादव, आनंद श्रीवास्तव, ललित मोहन रयाल, नवनीत पांडे, मेहरबान सिंह बिष्ट, बंशीधर तिवारी, झरना कमठान, रवनीत चीमा, रुचि तिवारी, गिरधारी सिंह और संजय कुमार कु नौ शामिल च.
किच्छा मा कैदियूं थै हाईटेक जेल: उत्तराखंडै जेलूं मा अत्यधिक कैदियूं की संख्या थै देखी उधमसिंह नगर मा अत्याधुनिक जेल कु निर्माण किये जांणू च. ई जेल का निर्माण द्वी फेज मा पूरु किये जालू. पैलू फेज का निर्माण कार्य शुरू ह्ले गी. पैला फेज मा 480 कैदियूं थै कारागार बणये जांणू च. या जेल किच्छा का रजपुरा गौ मा 40 एकड़ मा बणये जांणी च. ई जेल मा करीब 2,580 कैदी राला. ई जेल कु काम जुलाई 2023 तक पूरू ह्वे जालू.
उत्तराखंड मा अब सफर भी मैंगू: उत्तराखंड मा परिवहन निगमै बसूं समेत सबी पब्लिक ट्रांसपोर्ट कु किराया 15 से 50 प्रतिशत तक बढ़ये गी. यां का दगड़ा ही सवारी वाहनूं का अलावा मालभाड़ा वाहनूं का किराया मा बी 35 से 38 फीसदी की बढ़ोतरी करे गी. किराए मा यां बढ़ोतरी उत्तराखंडै सीमा मा ही लागू होली. राज्य परिवहन प्राधिकरण (STA) न यां का आदेश भी जारी करेन. किराया बढ़ण से उत्तराखंड रोडवेज थै हर दिन करीब 10 से 15 लाख रुपया कु राजस्व मिललू
मानसूनै दस्तक दगड़ि डेंगू कु खतरा:मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली
उत्तराखंड मा थमी कोरोना की रफ्तार:उत्तराखंड मां धीरे-धीरे कोरोना का मामला कम होंणा छन. आज प्रदेश मा कोरोना का 62 नया मामला समणि ऐनी, ज्या का बाद प्रदेश मा कोरोना संक्रमितू की संख्या 94,710 ह्वे गी, जबकि यां से मन्न वालौ की संख्या 283 च. प्रदेश मा कोरोना संक्रमित मरीजुं की रिकवरी रेट 96.10% च.
