अपणुं उत्तराखंड: दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

देश का पूर्व राष्ट्रपति प्रणब मुखर्जी भी कोरोना संक्रमित ह्वे गिन. देश मा कोरोना से हालात लगातार चिंता पैदा कन्नी च. पिछला 24 घंटा मा कोरोना का 62 हजार से ज्यादा नया केस समणि ऐन. जबकि 1007 लौखुं मौत ह्वे गी. देश मा कोरोना का कुल केस 22 लाख का पार पौंछगिन.

पतंजलि का प्रवक्ता एसके तिजारावाला न एक अखबार दगड़ी बातचीत मा खुलासा करि कि हम इं साल आईपीएले टाइटल स्पॉन्सरशिप लेंणों ते सोचणां छिन. किलेकि वू पतंजलि ते दुनिया का मंच पर ले जांण चांदा.

आज प्रधानमंत्री नरेंद्र मोदी वीडियो कांफ्रेसिंग का माध्यम से चेन्नई और पोर्ट ब्लेयर ते जोड़न्न वली सबमरीन ऑप्टिकल फाइबर केबल कू उद्घाटन करी. इंसे देश का अन्य हिस्सों का साथ अंडमान और निकोबार द्वीप समूह मा तेज मोबाइल और लैंडलाइन सेवा लौखुं ते मिल सकली.

उत्तराखंड मा भी कोरोना कू कहर कम नि होंणू च. रविवार का दिन प्रदेश मा कोरोना का 230 नया केस समणि ऐन. जैका बाद प्रदेश मा संक्रमितों की संख्या 9632 पौंछगी. वखि मन्न वलों की संख्या 125 च.

प्रदेश का पहाड़ी इलाकों मा बरखा लगातार बढ़नी च. गोपेश्वर-पोखरी रस्ता पर पहाड़ी बटि एक बोल्डर कार पर गिर गी. इं हादसा मा कार सवार नगर पंचायते ईओ की मौका पर ही मौत ह्वे गी.

पहाड़ों मा लगातार बरखा से मैदानी इलाकों मा नदी-नाला उफान पर छिन. हरिद्वार मा गंगा नदी खतरा का निशान पर पौंछगी. जैका बाद उत्तराखंड और यूपी का तटवर्ती इलाकों मा रौंण वला लौंखु ते अलर्ट जारी कर्यूं च. आपदा कंट्रोल विभाग भी अलर्ट मोड पर च.

राजधानी देहरादून मा भी बरखा कू रौद्र रूप जारी च. देहरादून मा होंण वली भारी बरखा का कारण रिस्पना और बिंदाल नदी उफान पर. कई जगहों पर भू-कटाव भी होंणू च. बिंदाल पुल का पास दून स्कूले दीवार भी गिर गी. हालांकि इं हादसा मा क्वी जान-माले नुकसाने खबर नि च.

रुद्रप्रयाग जिला का सिरवाड़ी गौं मा बादल फटणं से भारी तबाही ह्वे. गौं मा कई घर टूटी गेन. वखि, पैदल रस्ता और पुलिया भी बह गिन.

टिहरी जिला का गंगी गौं मा बादल फटंण से भारी तबाही ह्वे. गंगी गौं मा द्वी गौशाला पूरी तरह मलबा मा बदल गी. जैका कारण यख 20 से जादा पशु मलबा मा दफन ह्वे गिन.

भोल सीएम त्रिवेन्द्र सिंह रावत सचिवालय मा शासन का सभी सचिवों का साथ मीटिंग करला. जैमा सीएम लंबित फाइलों कू हिसाब मंगला.