देश मा कोरोना से मौत कू आंकड़ा 700 का करीब
देश मा कोरोना महामारी लगातार अपणु पैर पसारणी च. अब तक 21393 लोखुं मा कोरोना संक्रमणए पुष्टि. 681 लोखुं की गै जान. हालांकि 4258 लोग यू बीमारी से ठीक हव्या.
केंद्र पर बढ़ी आर्थिक बोझ, रोकी महंगाई भत्ता
कोरोना वायरस प्रकोप कू असर अब केंद्र सरकारक खजाणु पर भी पड़णु च. जे वास्ता अब सरकार न कटौती कन्न शुरू करी. मोदी सरकार न अपना कर्मचारी और पेंशनर्स ते मिन्न वला महंगाई भत्ता पर जुलाई 2021 तक लगे रोक.
कोरोना मामला मा कांग्रेस न मोदी सरकार ते दे सुझाव
देश मा कोरोना संकट का बीच सोनिया गांधी अध्यक्षता मा कांग्रेस वर्किंग कमिटी की बैठक ह्व़े. जेमा कांग्रेस न मोदी सरकार ते कई सकारात्मक सुझाव दे. साथ ही कोरोना वॉरियर्स ते सलाम भी करी.
स्वास्थ्यकर्मियों पर हमला कन्न वलों की अब नि खैर
कोरोना का खिलाफ लड़े का दौरान स्वास्थ्यकर्मियों पर होण वला हमला रोकंड़ ते महामाही रोग अधिनियम-1897 मा सरकार न करी संशोधन. यू नयु अध्यादेश ते राष्ट्रपति रामनाथ कोविंद बटी भी मिली मंजूरी
9 मेहना नौना न 6 दिन मा कोरोना ते हरे
देहरादून मा एक 9 मेहना का नौना न कोरोना ते दे मात. मात्र 6 दिन मा यू नौना कोरोना का खिलाफ लड़े जीत गे. बते जाणु च कि यू नौना का पिता ते भी ह्व़े छो कोरोना. पर वू भी अस्पताल बटी डिस्चार्ज ह्व़े गिन.
लापरवाह डॉक्टरों का खिलाफ मुकदमा
कोरोना का खिलाफ लड़े मा कुछ डॉक्टर यन भी छिन ज्योन इं भारी संकट का बाद भी अभी तक ड्यूटी ज्वाइन नि करी. यन ही एक डॉक्टर का खिलाफ चमोली मा जिलाधिकारी स्वाति भदोरिया का आदेश पर दर्ज ह्व़े मुकदमा.
43 साल बाद फिर वाहन पर सवार होली भगवान केदारनाथे डोली
भगवान केदारनाथ का कपाट 29 अप्रैल का दिन खोली जाला. 26 अप्रैल का दिन केदारनाथे डोली शीतकालीन गद्दीस्थल बटी रवाना होली. जू एक वाहन बटी सीधा गौरीकुंड जाली. आज तक का इतिहास मा यू तीसरी बार च जब बाबा केदारे डोली वाहन बटी ले जाली. इंसे पेहली साल 1977 मा वाहन मा निकली छे डोली.
शादी कु झांसा, नौनी दगड़ी दुष्कर्म
काशीपुर का आईटीआई थाना क्षेत्र मा एक नौनी न अपणु गौ का एक नौना पर शादी का नाम पर दुष्कर्म कन्नो आरोप लगे. आरोप का आधार पर पुलिस न वे नौना का खिलाफ मुकदमा दर्ज करी.
हरिद्वार मा कुंभ मेला ते काम ह्व़े शुरू
लॉकडाउन का कारण रुक्यां कई सरकारी काम अब धीरा-धीरा शुरू ह्व़े गिन. इं कड़ी मा हरिद्वार मा कुंभ मेला 2021 ते भी काम शुरू ह्व़े गी. इंका अलावा हरिद्वार शहर मा बिजली के लेनों ते अंदर ग्राउंड कन्नो काम भी ह्व़े गी शुरू.
आईआईटी रुड़की न तैयार करी स्क्रीनिंग बूथ, नि पड़ली पीपीई किटे जरूरत
रुड़की नगर निगम का सहयोग से आईआईटी रुड़की का शोध करतोन कोरोना संदिग्धों कु सैंपल जांच खुंण तैयार करी स्क्रीनिंग बूथ. स्वास्थ्य विभागे काफी मदद आलु आईआईटी रुड़की कू यू नयु आविष्कार. यू अविष्कार का बाद नि पड़ली महंगी पीपीई किटे जरूरत.
