देश मां कोरोना संक्रमितूं की संख्या 14,000 पार
देश मां लगातार कोरोना कु कहर जारी. हर दिन नया-नया मामला समणि औंणा छन. शनिवारौं नौसेना का 21 कर्मियूं मा कोरोना पॉजिटिव मिली. यू मां आईएनएस और एंगरे का 20 नाविक भी शामिल छन. अब तक देश मा कोरोना संक्रमितुं की संख्या 14 हजार पार ह्वे गी. जबकि ये से मन वलौ की संख्या 480 ह्वे गी.
स्विस पर्वत ह्वे तिरंगा का रंग से रोशन
दुनियाभर का 200 से ज्यादा देश आज कोरोना वायरस का संक्रमण से प्रभावित छन . भारत और स्विटजरलैंड भी लगातार कोरोना से लड़नौ प्रयासरत च. यूं द्वी देशुं मा अलग-अलग सकारात्मक गतिविधि होंणी छन. यां का बीच स्विटजरलैंड का मैटरहॉर्न पहाड़ै तस्वीर समणि ऐ. जै मा स्विटजरलैंड न वैज्ञानिक तकनीक से तिरंगा कु प्रदर्शन करी.
कोटा मां फंसीन यूपी बिहार का हजारुं छात्र
कोरोना महामारी का बीच भारत थै इंजीनियर और डॉक्टर देंण वालु कोटा अब राजनीति कु अखाड़ा बंण गी. यख बिहार और उत्तर प्रदेश का हजारुं इंजीनियरिंग और मेडिकल का छात्र फस्ंया छन. करीब 35 हजार छात्रुं न घर वापसी थै लेकी बिहार का मुख्यमंत्री नीतीश कुमार और उत्तर प्रदेश का मुख्यमंत्री योगी आदित्यनाथ से गुहार लगै. मगर अब तक यूं की वापसी थै कुछ नी करें गी.
गुजरात बायोटेक रिसर्च सेंटर न ढूंढी कोरोना जीनोम
गुजरात जैव प्रौद्योगिकी अनुसंधान केंद्र न कोरोना जीनोमै खोज से कोरोना वायरस थै एक टीका विकसित कनै उम्मीद जतै. या मा पशु, मानव और वनस्पति जन जीवुं की प्रकृति, व्यवहार और संरचना का डीएन से टीका तैयार होंदू. यूं का आरएनए एसिड से वायरसै गठनौ पता लगये जै सकदू. जै से मानव शरीर मां होंण वाली प्रकृति कु पता लगयै जै सकदु
रुड़की मा मिलिन द्वी कोरोना मरीज, आंकड़ा बढ़ी ह्वे 42
शनिवारौ प्रदेश मां कोरोना का द्वी नया मामला समणि ऐनी. यू द्वी मामला रुड़की बटी एनी. यूं मा सा एक एक भगवानपुरै रौंण वाली महिला है, जबकि दूसरु हाथरसौ युवक च, जुकि ऋषिकेश मा काम करदू. यूं द्वयू थै आइसोलेट करे गी. यां का बाद प्रदेश मां कुल कोरोना संक्रमितुं की संख्या 42 ह्वे गी
26 दिन बाद खुली विधानसभा
लंबा अंतराल का बाद उत्तराखंड विधानसभा खुल गी. शुक्रवार बटी मंत्रियूं ने कामकाज भी शुरू कयेली. 26 दिन का बाद विधानसभा अध्यक्ष प्रेमचंद अग्रवाल समेत कई मंत्री विधानसभा पौछिन, यूं मां शहरी विकास मंत्री मदन कौशिक, वन मंत्री हरक सिंह रावत, राज्य मंत्री धन सिंह रावत, कृषि मंत्री सुबोध उनियाल शामिल रैन, ये दौरान सभी मंत्र्यूं बोली कि कोरोना थै हरौणों सोशल डिस्टेंसिंग और सैनिटाइजेशनौ पूरु ध्यान रखे जालू
मुख्य सचिव न लिनी अफसरुं की वीडियो कॉन्फ्रेंसिंग बैठक
शुक्रवारौ मुख्य सचिव उत्पल कुमार सिंहन सचिवालय मा वीडियो कॉन्फ्रेंसिंग का माध्यम से सभी जिलों का जिलाधिकारी, पुलिस अधीक्षक और मुख्य चिकित्सा अधिकार्युं दगड़ि बैठक करी. जैमा उन अधिकार्युं थै दिशा निर्देश दिनी. मुख्य सचिव न जिला अधिकार्युं थैं बोली कि जिला मा आईसीएमआर का दिशा - निर्देशुं का हिसाब से कोरोना टेस्ट करये जौं. यां का अलावा सभी कोरोना पॉजिटिव मरीजुं का फोन मा आरोग्य सेतु ऐप इंस्टॉल कन्नौ भी मुख्य सचिव न प्रमुखता से बोली.
आरोग्य सेतु एप डाउनलोड मा हिमाचल से अगनै उत्तराखंड
देश मा कोरोना की रोकथामौ केंद्र सरकार और पीएम मोदीन आरोग्य सेतु एप डाउनलोड कनै अपील करी छै. जैका बाद आरोग्य सेतु एप डाउनलोड कन्ना मामला मा उत्तराखंडन पड़ोसी राज्य हिमाचल प्रदेश थै पीछनै छोडेली. आंकड़ों का मुताबिक 17 अप्रैल तक उत्तराखंड मा 2 लाख 79 हज़ार 983 से अधिक लोगुन यू एप डाउनलोड करी, जबकि हिमाचल मा 2 लाख 16 हजार 231 लोखुं न यू एप डाउनलोड करी
लॉकडाउन मा ऑनलाइन होली विश्वविद्यालयूं की पढै
कोरोना वायरस और लॉकडाउन का कारण प्रदेश मा सबी शैक्षणिक संस्थान बंद छन. इन मा छात्र-छात्रौं की पढ़ै पर यां कु असर पौडनु च. जै थै देखी उच्च शिक्षा विभाग न अब ऑनलाइन क्लास शुरू कन्ना आदेश जारी करेनी. हालांकि स्कूली शिक्षा का खातिर पैली है ऑनलाइन क्लासेस शुरू ह्वे गिन. अब 21 अप्रैल बटी उच्च शिक्षा की भी आमलाइन क्लास शुरू होली.
दून मेडिकल कॉलेज का प्राचार्य न सफाईकर्मिय्यूं दगड़ि मनै जन्मदिन
कोरोना संक्रमण का दौर मा देश का लोग सफै कन वालौ कु लगातार हौसंला बढ़ौणा छन. सभी फूल मालाउं से उंकी स्वागत कन्ना छन. इ कड़ा मा उत्तराखंड का सबसे बड़ा सरकारी दून मेडिकल कॉलेज का प्राचार्य डॉ आशुतोष स्याना न एक अनोखी मिसाल पेश करी. उंन बड़ी ही सादगी से अस्पताल का सफाईकर्मियूं दगडि अपणु जन्मदिन मनै
