ગુજરાતમાં અમદાવાદથી મુંબઇ વચ્ચે નેશનલ હાઇવે ઓથોરીટી ઓફ ઇન્ડિયા અને IRB દ્વારા ટોલનાકા ઉભા કરાયાં છે. જેમાં આ નેશનલ હાઇવે નંબર 48 પર વાપી નજીકના બગવાડાથી મહારાષ્ટ્રના ખાનીવડા વચ્ચે ચારોટી, બગવાડા, બોરિયાચ અને ખાનીવડા ખાતે ટોલ પ્લાઝા છે. આ ટોલ પ્લાઝાએ ઉભેલી એમ્બ્યુલન્સ શોભાનાં ગાંઠિયાની સમાન સાબિત થઇ રહી છે. કારણ કે, સેવાનો લાભ મેળવવા માટેના સંપર્ક નંબરો જ સાચા લખવામાં આવ્યા નથી. જેથી કોઇને સેવાનો લાભ જ મળતો નથી.
નેશનલ ધોરીમાર્ગો પર ટોલનાકા ઉભા કરી દર્દીઓના નામે કરોડોનું કૌભાંડ આચરતું NHAI અને IRB તંત્ર આ અંગે માનવાધિકાર મિશનના મહારાષ્ટ્રના પ્રભારી એવા હરબન સિંઘે જણાવ્યું હતું કે, હાલમાં નેશનલ હાઇવે નંબર 48ના ખાનીવડા, ચારોટી, બગવાડા, બોરિયાચ જેવા ટોલ પ્લાઝા પર જ્યારે દાખલ થશો, ત્યારે મોટા મોટા NHAI-IRB એ ચીતરાવેલા બોર્ડો જોવા મળશે. જેમાં ટોલની છૂટ, ટોલનો ભાવ, હેલ્પ લાઈનનો નબરો વાંચવા મળશે. પરંતુ અકસ્માતના સમયે ઈમરજન્સી સેવા માટે ઉપલબ્ધ કરાયેલી એમ્બ્યુલન્સનો સંપર્ક નંબર આવા બોર્ડ પર જોવા મળશે નહીં. જો તમને મળશે તો કદાચ સરકારી મફત ઈમરજન્સી સેવા 108 નંબરવાળી એમ્બ્યુલન્સનો, નજીકના હોસ્પિટલનો નંબર અથવા એમના હેલ્પ લાઈનનો નંબર મળશે.
મહારાષ્ટ્રમાં આવેલા ચારોટી અને ખાનીવડા ખાતે આ સેવા અત્યાર સુધી નરેન્દ્ર મહારાજ સેવા સંસ્થાની એમ્બ્યુલન્સ પુરી પડતી હતી. જેનો વિરોધ કરવામાં આવતા અહીં બોર્ડ પરથી તેમનું નામ દૂર કરાયું છે. પરંતુ અંદર ખાને સેવા તો તેની જ ચાલે છે. જ્યારે ગુજરાતમાં NHAI-IRB વાળા પોતાની રાખેલી એમ્બ્યુલન્સનો ખોટો ખર્ચ પાડી, મફત સરકારી 108 નંબર વાળી એમ્બ્યુલન્સ સેવાનો ઉપયોગ કરે છે.
આ ઉપરાંત તે હાઇ-વેને દુર્ઘટના રહીત હોવાની છાપ ઉપસાવે છે. કેમ કે તેમની એમ્બ્યુલન્સ દોડે તો રાજીસ્ટરમાં અકસ્માતના આંકડાં લખવા પડે જ્યારે અન્ય એમ્બ્યુલન્સ સેવામાં વપરાય તો તે મુસીબત ઓછી થઇ જાય છે. વળી, નેશનલ હાઇવે નંબર 48 પર મૂકવામાં આવેલા ઇમર્જન્સી બોર્ડ પર લખાતા હૉસ્પિટલોના નામ અને ફોન નંબરમાં પણ મસમોટુ કૌભાંડ છે. બોર્ડ પર મફતમાં હૉસ્પિટલનું નામ અને ફોન નંબર લખાવવા હૉસ્પિટલના સંચાલકોની પણ લાંબી કતાર લાગે છે. કારણ કે આ તો ખાનગી હોસ્પિટલવાળાઓને જાહેરાત અને માર્કેટિંગનો મફ્તમાં મળતો લાડવો છે. અકસ્માતમાં ઈજાગ્રસ્ત લોકોને આવી હોસ્પિટલોમાં દાખલ કરવાથી મસમોટી રકમ પ્રાપ્ત થાય છે.
IRBએ દર નિયત અંતરે હોસ્પિટલ, દર્દીને લઈ જવા એમ્બ્યુલન્સ, જરૂરી દવાઓ, ટ્રેઇન્ડ ડોકટર સ્ટાફ, નજીકમાં જ ટ્રોમાં સેન્ટરથી સજ્જ હોસ્પિટલ વગેરે સુવિધાઓ પુરી પડવાની હોય છે. જેમાંની એકપણ સુવિધા IRB પુરી પડતું નથી. આ વિસ્તારમાં કાસા નજીક દરરોજ એકાદ બે અકસ્માત થાય છે. જેમાં ઘાયલ દર્દીને 50 કિલોમીટર દૂર ટ્રોમાં સેન્ટર અને વધુ સારવારની સુવિધા પુરી પાડવા ખાનગી કે સરકારી એમ્બ્યુલન્સમાં સંઘપ્રદેશ દાદરા નગર હવેલીના સેલવાસમાં આવેલ વિનોબા ભાવે હોસ્પિટલ કે 60 કિલોમીટર દૂર વસઈની સરકારી હોસ્પિટલમાં લઇ જવા પડે છે.
ઉલ્લેખનીય છે કે NHAI-IRB એ પોતાની એમ્બ્યુલન્સ તો રાખવાની જ છે. પરંતુ હાઇવે અથવા ટોલ પ્લાઝા નજીક પોતાની ટ્રોમા હોસ્પિટલ પણ બનાવી ઇજાગ્રસ્તોને મફતમાં ઈલાજ કરવાનો હોય છે. પરંતુ NHAI-IRB વાળાઓએ તો આખું જ કોળું દાળમાં ખાય જવું છે. હવે જે તે ટોલ પ્લાઝાની હદમાં આવતા જિલ્લાતંત્ર NHAI-IRBની એમ્બ્યુલન્સોની વિગતો મંગાવી દર 10 કિ.મીએ ફરજીયાત પણે એમ્બ્યુલન્સ રાખવાની તેમજ બોર્ડ પર એમ્બ્યુલન્સનો નંબર ચિત્રાવવા બાબતે NHAI-IRB અંગે કડક પગલાં લે તો જ આવા કૌભાંડનો અંત આવી શકે છે.
