વલસાડ: પારડી નજીક આવેલા એક ગામમાં એક વર્ષ પહેલા એક ૧૬ વર્ષીય સગીરા બજારમાં કેળા લેવા જવાનું કહીને પોતાના ઘરેથી નીકળી હતી. આ સગીરાને જલારામ ક્વોરીમાં ટ્રક ઉપર કામ કરતા ડ્રાઇવર હિતેશ વસાવાએ જેને લગ્નની લાલચ આપીને ભગાડી ગયો હતો. આ બાબતે સગીરાના પરિવારજનોએ પારડી પોલીસ મથકમાં ફરિયાદ નોંધાવી હતી.
પોલીસે હિતેશ સામે સગીરાનું અપહરણ અને દુષ્કર્મ ગુનો દાખલ કરીને આગળની તપાસ શરૂ કરી હતી. તેની શોધખોળ કરવા માટે પોલીસ તેના ગામ સુધી પહોંચી પરંતુ બંને હાથ લાગ્યા ન હતા. જો કે કેટલાક દિવસો બાદ સંબંધમાં તકરાર ઉભી થતા આ સગીરાએ તેની માતાને ફોન કરી ઘરે આવવાની ઈચ્છા જાહેર કરી હતી. આ સમગ્ર વિગતો સગીરાની માતા પારડી પોલીસને આપતા પોલીસે તેનો મોબાઈલ નમ્બર ટ્રેસ કરી લોકેશન ચેક કરતા બંને પ્રેમી પંખીડા ભાવનગરમાં હોવાનું બહાર આવ્યું હતું.
પારડી પોલીસે એક ટીમ ભાવનગર રવાના કરી બંનેને પારડી પાછા લવાયા હતા. તેમનો મેડિકલ ટેસ્ટ કરાવ્યા બાદ યુવાનને વલસાડ કોર્ટમાં રજૂ કરવામાં આવ્યો હતો.