- ઈંટોના ભઠ્ઠામાં SOGએ દરોડો પાડી વેસ્ટ કેમિકલનો જથ્થો ઝડપી પાડ્યો
- બે ટ્રક અને બે ફોન મળીને કુલ રૂપિયા 13.21 લાખનો મુદ્દામાલ કબ્જે કર્યો
- ઈંટો પકવવા પર્યાવરણને પ્રદુષિત કરતા 3ની ધરપકડ
વડોદરા : ગ્રામ્યના વડુ ખાતે કણજટ ગામની સીમમાં ઈંટોના ભઠ્ઠામાં SOGએ દરોડો પાડી વેસ્ટ કેમિકલનો જથ્થો ઝડપી પાડ્યો હતો. પર્યાવરણની ઘોર ખોદતો ભઠ્ઠીના સંચાલકે કેમિકલનો બળતણ તરીકે ઉપયોગ કરવા બે ટ્રક ભરી બેરલ અને પીપ મંગાવ્યા હતા. પોલીસે આરોપી ઘનશ્યામ પટેલ તથા ટ્રક ડ્રાઈવર અને ક્લિનર મળીને ત્રણની ધરપકડ કરી હતી. વેસ્ટ કેમિકલનો યોગ્ય નિકાલ કરવાની જગ્યાએ પાનોલીની પ્રોફાઈલ ઈન્ડ્રસ્ટ્રીઝ કંપની દ્વારા વચેટિયાની મદદથી બારોબાર વેચી મારવામાં આવતું હતું.
ઈંટોના ભઠ્ઠામાં ઈંટો પકવવા એક ટ્રક કેમિકલ વેસ્ટ ભરેલા બેરલ મંગાવવામાં આવ્યા
વડુ પોલીસ સ્ટેશનની હદમાં કણજટ ગામની સીમમાં આવેલા ઘનશ્યામ ચીમન પટેલના એસબીજી ઈંટોના ભઠ્ઠામાં ઈંટો પકવવા એક ટ્રક કેમિકલ વેસ્ટ ભરેલા બેરલ મંગાવવામાં આવ્યા છે. તેવી બાતમી જિલ્લા SOGને મળી હતી. જેના આધારે SOGએ સ્થળ પર દરોડો પાડ્યા હતા. જ્યાંથી આરોપી ઘનશ્યામ પટેલ તથા ટ્રક ડ્રાઈવર મણીલાલ કાળીદાસ પટેલ તથા ક્લિનર ભાવેશજી ગોકળજી ઠાકોર મળી આવ્યા હતા.
આ પણ વાંચો : વડોદરા SOGએ ડુબ્લિકેટ AC અને ટીવીનું વેચાણ કરતા ઈસમની કરી ધરપકડ
જમીન પર ઢોળેલો સોલીડ વેસ્ટ કેમિકલનો જથ્થો મળ્યો
પોલીસે ત્રણેય આરોપીને સાથે રાખી ટૂંકમાં તપાસ કરતા લોખંડ તથા પ્લાસ્ટિકના વેસ્ટ કેમિકલ ભરેલા 200 લિટરના 49 બેરલ તથા ભઠ્ઠામાંથી 12 બેરલ મળી આવ્યા હતા. આ ઉપરાંત જમીન પર ઢોળેલો સોલીડ વેસ્ટ કેમિકલનો જથ્થો મળ્યો હતો. પોલીસ ઘનશ્યામની વધુ પૂછપરછ કરતા ભઠ્ઠાની બાજુમાં આવેલી જગ્યામાં વધુ વેસ્ટેજ ઓઈલ સંતાડી રાખ્યું હોવાનું કબુલાત કરી હતી.