કરજણ/વડોદરા: શહેર કોંગ્રેસ પ્રવક્તા શૈલેષ અમીને જિલ્લા કલેક્ટર અને ચૂંટણી અધિકારીને આપેલા આવેદન પત્રમાં જણાવ્યું છે કે, નાયબ મુખ્યપ્રધાન નીતિન પટેલ ઉપર ફેંકવામાં આવેલા જૂતાની ઘટના અંગે પોલીસના ઉચ્ચ અધિકારીઓ દ્વારા તપાસ કરવામાં આવી રહી છે.
મોબાઈલ મેસેજના આધારે શિનોરના રશ્મિન પટેલનું નામ સામે આવ્યું છે. જેને વડોદરા જિલ્લા પોલીસના અધિકારીઓએ કોઈ નક્કર પુરાવા વિના કોંગ્રેસનો આરેપી ગણાવ્યો છે. જ્યારે વાસ્તવિકતામાં ચપ્પલ ફેંકનારો રશ્મિન પટેલ ભાજપનો સક્રિય કાર્યકર છે. તે ભાજપનું ઓળખપત્ર ધરાવે છે, તેમજ ભાજપે તાલુકા પંચાયતમાં કારોબારી તેની પ્રમુખ તરીકે નિમણૂક કરી હોવાના પુરાવા હોવાનું કોંગ્રેસ શહેર પ્રવક્તા શૈલેષ અમીને જણાવ્યું હતું.
વધુમાં શૈલેષ અમીને જણાવ્યું કે, રશ્મિન પટેલ કોંગ્રેસનો કાર્યકર હોવાનું જાહેર કરાયા બાદ રાજ્યના સીએમ વિજય રૂપાણીએ પણ કોંગ્રેસને સંયમ રાખવાની સલાહ આપી હતી. કોંગ્રેસ પ્રવક્તાએ કહ્યું કે, ચૂંટણી દરમિયાન આવા નિવેદન આચાર સંહિતાનું ઉલ્લંઘન છે.
