સુરતઃ ત્રણ એસ.ટી બસ ડેપોનું લોકાર્પણ કરાયું

બારડોલીઃ રાજ્યના વાહન વ્યવહાર વિભાગ દ્વારા સુરત જિલ્લાના ત્રણ જેટલા એસ.ટી બસ ડેપોનું લોકાર્પણ કરવામાં આવ્યું હતું. કેબિનેટ પ્રધાન ઈશ્વર પરમારે બારડોલી ખાતે લોકાર્પણ કર્યું હતું.

રાજ્યના મુખ્યપ્રધાન દ્વારા શનિવારે ભાવનગરથી 21 જેટલા બસ ડેપોનું ઇ-લોકાર્પણ કરાયું હતું. જેમાં દક્ષિણ ગુજરાતના સુરત વિભાગના બારડોલી ડેપોનો પણ સમાવેશ કરાયો હતો. આ તકે રાજ્યના કેબિનેટ પ્રધાન અને બારડોલીના ધારાસભ્ય ઈશ્વર પરમારે બસ ડેપોનું લોકાર્પણ કર્યું હતું. આ સાથે જ બારડોલી વિધાનસભામાં બારડોલી અને કડોદરા એમ બે ડેપો નો સમાવેશ કરાયો હતો. તો માંડવીમાં પણ બસ ડેપોનું સાંસદ પરભુ વસાવાએ લોકાર્પણ કર્યું હતું.

3 કરોડના ખર્ચે નિર્મિત બારડોલી ડેપોના લોકાર્પણની સાથે બારડોલીથી સપ્તાહમાં દર શનિવારે, તેમજ રવિવારે બારડોલીથી કેવડિયા સ્ટેચ્યુ ઓફ યુનિટી સુધી A.C બસ દોડાવવાની પણ જાહેરાત કરાઈ હતી. બારડોલી ડેપોમાં સમાવિષ્ટ ગ્રામ્ય વિસ્તારના કેટલાક બંધ થયેલા રુટો પણ નફાનું ધોરણ ભૂલી સેવા માટે પણ ફરીથી શરૂ કરવામાં આવે તેવી ઈશ્વર પરમાર દ્વારા એસ.ટીના વિભાગીય નિયામકને તાકીદ કરવામાં આવી હતી.