પાકિસ્તાન સાથે વાત માત્ર POK મુદ્દે જ થશે: રાજનાથ સિંહ

સુરતઃ મારુતિ વીર જવાન ટ્રસ્ટ દ્વારા આયોજિત તૃતીય શહીદ પરિવાર સન્માન સમારોહમાં મુખ્ય અતિથિ તરીકે રક્ષા પ્રધાન રાજનાથ સિંહે હાજરી આપી હતી. જેમાં સિંઘે સુરતની ધરાથી પાકિસ્તાનને પડકાર ફેંક્યો હતો કે, પાકિસ્તાન સાથે વાત થશે તો માત્ર આતંકવાદને ખતમ કરવા અને POK મુદ્દે જ થશે.

રાજનાથે કહ્યું હતું કે, ભારતની પ્રગતિ અને વિકાસને પાડોશી દેશ પાકિસ્તાન પચાવી શકતો નથી. જેથી તે UNમાં જઈ ભારત વિશે જુઠ્ઠાણું ફેલાવી રહ્યું છે. દુનિયાની કોઈ તાકાત નથી કે, ભારતની સામે કોઈ ઉચી આંખ કરીને જોઈ શકે. પાકિસ્તાન સંયુક્ત રાષ્ટ્રસંધમાં માનવધિકારોનો મુદ્દો ઉઠાવીને આંતરરાષ્ટ્રીય સમુદાયને ગુમરાહ કરવાની કોશિશ કરી રહ્યું છે, પણ તે આ વાતમાં ફાવી શકશે નહી. ભારતમાં લધુમતિઓ અસુરક્ષિત હોવાની વાતો કરતા પાકિસ્તાન શીખ, બલુચિઓ પર અત્યાચારો કરીને માનવઅધિકારોનું હનન કરી રહ્યું હોવાનું કહ્યું હતું. જો પાકિસ્તાન આતંકવાદને ખત્મ નહી કરે તો, તેના ટુકડે ટુકડા થતા કોઈ રોકી શકશે નહી. માનવાધિકાર અને હ્યુમન રાઈટની વાતો કરનાર પાક પોતાના દેશમાં લઘુમતીઓની સુરક્ષા કરતું નથી.

રાજનાથે સુરતની ધરતી પરથી પાકિસ્તાનને પડકાર આપતા કહ્યું હતું કે, વર્ષ 1971 માં ધર્મના આધારે બે ભાગલા થયા હતા. પાકિસ્તાનને ફરી એક વખત ખંડ ખંડ થવાથી કોઈ રોકી શકતું નથી. જો તે આતંકવાદ નહિ રોકે તો, પાકિસ્તાન ખંડિત થશે.

પાકિસ્તાનના વડાપ્રધાન ઇમરાન ખાનને રાજનાથે ચુનોતીપૂર્ણ જવાબ આપતા કહ્યું હતું કે, તેઓએ પોતાના યુવાનોને LOC પાર જવાની હાલ ના પાડી છે. ત્યારે હું કહું છું કે, અમારી સેનાના જવાનો રાહ જોઈ રહ્યા છે, જો કોઈ LOC પાર કરી આવશે તો પરત જઇ શકશે નહી.