CAAનો વિરોધ: સુરત પોલીસે હિંસક પ્રવૃત્તિ કરનાર સામે નોંધ્યો રાયોટિંગ ગુનો, તપાસ શરૂ

દેશમાં ચારેય તરફ CAA અને NRCને લઇને વિરોધનો સુર ઉઠી રહ્યો છે, ત્યારે તેમાંથી સુરત શહેર પણ બાકાત રહ્યું નથી. જેને લઇને આજે ભારત બંધના એલાનને પગલે શહેરે સંપૂર્ણ રીતે બંધ પાડ્યુ હતું, પરંતુ લીંબાયત વિસ્તારમાં પોલીસ પેટ્રોલિંગ દરમિયાન કેટલાક અસામાજિક તત્વોએ પોલીસ પર પત્થરમારો કર્યો હતો. જેમાં એક પોલીસકર્મી ઘાયલ થયો છે. આ સમગ્ર ઘટનાને પગલે પોલીસે રાયોટિંગનો ગુનો નોંધવાની તજવીજ હાથ ધરી છે. ઉલ્લેખનીય છે કે, દેશભરમાં અને વિધાનસભામાં પણ CAA અને NRC મુદ્દે વિરોધનો વંટોળ ઉઠ્યો છે.

સુરત: આજે કેટલીક સંસ્થાઓ દ્વારા બંધનું એલાન કરાયું છે. CAA અને NRCના વિરુદ્ધમાં ભારત બંધના એલાનની અસર સુરતના કેટલાક વિસ્તારોમાં જોવા મળી હતી. ખાસ કરીને સુરતના લિંબાયત વિસ્તારમાં પથ્થરમારાની ઘટના પણ સામે આવી હતી જેમાં એક પોલીસ કર્મી ઈજાગ્રસ્ત થયો છે. પોલીસે હિંસક પ્રવૃત્તિ કરનાર લોકો સામે રાયોટિંગનો ગુન્હો નોંધવાની તજવીજ હાથ ધરી છે.

ભારત બંધ એલાન વચ્ચે સુરતના અતિસંવેદનશીલ વિસ્તાર ગણાતા લિંબાયત વિસ્તારમાં પોલીસ કાફલા ઉપર પથ્થરમારો કરવામાં આવ્યો હતો. બંધના એલાનના પગલે વહેલી સવારથી શહેરના અનેક વિસ્તારોમાં ચાપતો પોલીસ બંદોબસ્ત ગોઠવી દેવામાં આવ્યો હતો. સુરતના લિંબાયત વિસ્તારમાં પણ મદીના મસ્જિદની આસપાસના વિસ્તારમાં પોલીસ બંદોબસ્ત હતો. બંધના એલાનને પગલે CAA અને NRCના વિરુદ્ધમાં કેટલાક લોકોએ સ્વયંભુ બંધ પાડયો હતો. આ બંધના સમયે મદીના મસ્જિદની આસપાસ ઊભા થયેલા પોલીસ ઉપર કેટલાક અસામાજિક તત્વો દ્વારા પથ્થરમારો કરાયો હતો.આ ઘટના બાદ પોલીસ કાફલો ઘટના સ્થળે દોડી આવ્યો હતો. આ પત્થરમારાની ઘટનામાં એક પોલીસકર્મી ઘાયલ થયો છે. હિંસક પ્રવૃત્તિ કરનાર લોકો સામે પોલીસે રાયોટિંગનો ગુનો નોંધવાની તજવીજ હાથ ધરી છે. આ સાથે બંધનો એલાન કરનારા લોકોની પુછપરછ હાથ ધરાઈ છે. અત્યાર સુધીમાં ઘટનામાં કેટલાક લોકોની પોલીસે અટકાયત પણ કરી હોવાનું જાણવા મળ્યું છે.