મતદાન જાગૃતિનો સંદેશો આપવા ટ્રેનનું સુરતમાં ભવ્ય સ્વાગત કરાયું

સુરત: ચૂંટણી પંચે મતદાન જાગૃત્તિ માટે ખાસ તૈયાર કરાયેલી હાવરા એક્સપ્રેસ ટ્રેનનું સુરત રેલ્વે સ્ટેશન ખાતે જિલ્લા ચૂંટણી અધિકારી ડો.ધવલ પટેલે ભવ્ય સ્વાગત કર્યું હતું.

લોકસભાની સામાન્ય ચૂંટણીમાં મતદારો પોતાના પવિત્ર મતાધિકારનો વધુમાં વધુ ઉપયોગ કરે તેવી આશાથી કેન્દ્રીય ચૂંટણી પંચના ઉપક્રમે મતદાર જાગૃતિના સંદેશ સાથે તૈયાર થયેલી હાવરા એક્સપ્રેસ ટ્રેન સવારે સુરત રેલ્વે સ્ટેશન આવી પહોંચી હતી. જેનું જિલ્લા ચૂંટણી અધિકારી અને કલેકટર ડો. ધવલ પટેલે ભવ્ય સ્વાગત કરીને ફ્લેગ ઓફ આપી આગળ પ્રસ્થાન કરાવ્યું હતું. હાવરા એક્સપ્રેસ મતદાન જાગૃતિ અંગેના વિવિધ સ્ટીકરો દ્વારા મતાધિકારને લગતા સ્લોગનો સાથે વિવિધ સ્ટેશનો પરથી પસાર થઈ મતદાન જાગૃતિનો સંદેશો ફેલાવી રહી છે.

આ પ્રસંગે ડો.ધવલ પટેલે જણાવ્યું હતું કે, લોકશાહીના મહાપર્વમાં દરેક મતદારો પોતાના મતાધિકારનો ઉપયોગ કરીને વધુમાં વધુ મતદાન કરે તે હેતુથી ચૂંટણીપંચ દ્વારા ભારતીય રેલવેના સહયોગથી મતદાર જાગૃતિના સંદેશા સાથે હાવરા એક્સપ્રેસ ટ્રેનની શરૂઆત કરવામાં આવી છે. લોકશાહીના પર્વમાં સૌને જોડાવાનો અનુરોધ પણ કર્યો હતો.

આ અવસરે કોલેજ, NSSના વિદ્યાર્થીઓ, સુમન હાઈસ્કુલ, કાંસાનગર કુમાર ગુરૂકુળના વિદ્યાર્થીઓ મોટી સંખ્યામાં જોડાયને પ્લે કાર્ડ, બેનરો દ્વારા મતદાર જાગૃતિનો સંદેશો ફેલાવ્યો હતો. મતદાર જાગૃતિ માટે EVMમશીન,VVPET દ્વારા મોકપોલ કાર્યક્રમ દ્વારા રેલ્વે સ્ટેશન પરના મુસાફરોને મતદાન અંગે જાગૃત કરવામાં આવ્યા હતા.

ઉલ્લેખનીય છે કે, ૮મી એપ્રિલના રોજ હાવરા એક્સપ્રેસ ટ્રેન પશ્ચિમ બંગાળથી નીકળી ઝારખંડ, ઓડિશા, છત્તીસગઢ, મહારાષ્ટ્ર અને ગુજરાત એમ છ રાજ્યોમાંથી પસાર થઈ સુરત આવી પહોંચી હતી. સુરતથી પ્રસ્થાન કરી વડોદરા થઈ અમદાવાદ જશે. કુલ 2089 કિમીનું અંતર કાપી હાવરા એક્સપ્રેસ ટ્રેન છ રાજ્યોમાંથી પસાર થઈ મતદાન જાગૃત્તિનો સંદેશો લઈ મતદારોને જાગૃત કરી રહી છે.