બારડોલીમાં ઉચ્ચ અધિકારીઓને બહાર બેસાડી આરોગ્ય પ્રધાને પક્ષના નેતાઓ સાથે મિટિંગ યોજી

સુરત જિલ્લાના બારડોલી ખાતે સર્કિટ હાઉસમાં રાજ્ય આરોગ્ય પ્રધાન કિશોર કાનાણી કોરોનાને લઈ સમિક્ષા બેઠક માટે આવ્યા હતા. જ્યાં પ્રધાને પહેલા તંત્ર સાથે બેઠક કરવાની જગ્યાએ પક્ષની બેઠક બોલાવતા જિલ્લા કલેક્ટર સહિતના અધિકારીઓએ દોઢ કલાક સુધી રાહ જોવી પડી હતી.

• દોઢ કલાક જેટલો સમય બરબાદ કરતાં ઉચ્ચ અધિકારીઓમાં પણ છૂપો રોષ
• આરોગ્ય અધિકારીઓનો પણ સમય બરબાદ કર્યો
• જિલ્લાના ગ્રામ્ય વિસ્તારમાં છેલ્લા પંદર દિવસમાં 5,000થી વધુ કેસ

સુરત : બારડોલી સર્કિટ હાઉસ ખાતે ‘‘મારૂં ગામ, કોરોનામુક્ત ગામ’’ અભિયાનની કામગીરીની સમીક્ષા- માર્ગદર્શન માટે રાજ્ય આરોગ્ય પ્રધાન કિશોર કાનાણીએ તંત્રને પ્રાધાન્ય આપવાની જગ્યાએ પહેલા પાર્ટીના હોદ્દેદારો સાથે બેઠક કરતાં કલેક્ટર, જિલ્લા વિકાસ અધિકારી, મુખ્ય જિલ્લા આરોગ્ય અધિકારી સહિતના ઉચ્ચ અધિકારીઓને દોઢ કલાક સુધી બહાર બેસી રહેવાનો વારો આવ્યો હતો. હાલ આરોગ્ય તંત્રને નવરાશનો સમય મળતો નથી, ત્યારે જિલ્લાના તમામ તાલુકાનાં આરોગ્ય અધિકારીઓ અને CHCના અધિક્ષકોને લાંબો સમય બેસાડી રાખતા અધિકારીઓમાં પણ છૂપો રોષ જોવા મળ્યો હતો.

ગ્રામ્ય વિસ્તારમાં ‘મારૂ ગામ કોરોનામુક્ત ગામ’ અભિયાન

સમગ્ર સુરત જિલ્લામાં છેલ્લા પંદર દિવસમાં 5,000થી વધુ કોરોનાના કેસ સામે આવ્યા છે. વધી રહેલા કેસ છતાં રાજ્ય આરોગ્ય પ્રધાને જણાવ્યું હતું કે, કોરોનાને હરાવવા રાજ્ય સરકાર યોગ્ય દિશામાં અને સ્પષ્ટ રણનીતિ સાથે આગળ વધી રહી છે. રાજ્યના તમામ ગામોમાં કોરોનાના સંક્રમણને ગામમાં જ દબાવી દેવા રાજ્ય સરકારે “મારૂં ગામ, કોરોનામુક્ત ગામ” અભિયાનનો પ્રારંભ કર્યો છે. ગુજરાતના ગામડાઓને સંપૂર્ણ કોરોનામુક્ત કરવા આ 15 દિવસનું અભિયાન ખૂબ જ નિર્ણાયક સાબિત થશે. સુરત જિલ્લામાં 12 CHC અને 55 PHCના સહયોગથી તેમના વિસ્તારમાં આવતા 545 ગ્રામ પંચાયતોમાં અભિયાનને વેગવાન બનાવાશે.

બારડોલી

તંત્રની જગ્યાએ પહેલા પક્ષના હોદ્દેદારો સાથે બેઠક

રાજ્ય આરોગ્ય પ્રધાને બારડોલી ખાતે કોરોનાને લઈને 'મારૂ ગામ કોરોનામુક્ત ગામ અભિયાન' અંતર્ગત સમિક્ષા બેઠક માટે આવ્યા હતા. આ બેઠકમાં જિલ્લા કલેક્ટર, જિલ્લા વિકાસ અધિકારી, જિલ્લા આરોગ્ય અધિકારી સહિતના ઉચ્ચ અધિકારીઓ ઉપસ્થિત રહ્યા હતા, પરંતુ હમેશાની જેમ વાહવાહી લૂટવાના પ્રયાસમાં પ્રધાન કિશોર કાનાણીએ તંત્રના અધિકારીઓ સાથે બેઠક કરવાની જગ્યાએ પહેલા પક્ષના હોદ્દેદારો સાથે ચર્ચા કરી હતી.

બારડોલી

આ પણ વાંચો : આરોગ્ય રાજ્ય પ્રધાન કિશોર કાનાણી PPE કીટ પહેરીને કોવિડ વોર્ડમાં ગયા, પ્રત્યેક દર્દીના ખબર અંતર પૂછ્યા

રાજકીય મેળાવડા પર પ્રતિબંધ છતાં પક્ષની બેઠક કરી

જે તંત્ર કોરોના મહામારીમાં ખૂબ જ વ્યસ્ત હોવા છતાં અલગ અલગ તાલુકામાંથી આરોગ્ય અધિકારીઓ ઉપસ્થિત રહ્યા હતા. તેમને દોઢ કલાક સુધી બહાર બેસાડી રાખવામાં આવ્યા હતા. એક તરફ સરકાર દ્વારા રાજકીય મેળાવડા બંધ કરવાની વાત કરવામાં આવે છે અને તે જ સરકારના આરોગ્ય પ્રધાન તંત્ર સાથે બેઠક કરવાની જગ્યાએ પહેલા પક્ષના નેતાઓ સાથે દોઢ કલાક સુધી ચર્ચા કરે, ત્યારે તેમની રાજકીય લાભ ખાટવાની નીતિ ખુલ્લી પડી જાય છે.

આ પણ વાંચો : ઉમરગામ તાલુકામાં કિસાન સૂર્યોદય યોજનાનો આરોગ્‍ય પ્રધાને કરાવ્યો શુભારંભ

ધરણાં પ્રદર્શન અંગે પૂછતાં જવાબ આપવાનું ટાળ્યું

પત્રકારો સાથેની વાતચીતમાં છેલ્લા બે દિવસથી રાજ્યના અલગ અલગ વિસ્તારોમાં બંગાળ હિંસાના વિરોધમાં ધરણાં પ્રદર્શન કરવામાં આવી રહ્યા છે. તેમજ અધિકારીઓને દોઢ કલાક સુધી બહાર બેસાડી મૂકવા બાબતે પૂછતાં મિટિંગ શરૂ થઈ ગઈ છે, એમ કહી તેમણે જવાબ આપવાનું ટાળ્યું હતું. માત્ર સરકારી કાર્યક્રમ અંગે માહિતી આપી પોતાની વાત પૂરી કરી હતી. હાલ સમગ્ર આરોગ્ય તંત્ર કોવિડ દર્દીઓની સેવામાં ખડે પગે છે, ત્યારે આરોગ્યના અધિકારીઓનો પણ સમય બરબાદ કરી પ્રધાન કિશોર કાનાણી દ્વારા કરવામાં આવેલી ચેષ્ટા કેટલા અંગે યોગ્ય ગણાય તે અંગે પણ ચર્ચા ઉઠી છે.