સુરતમાંથી ડુપ્લિકેટ ગુટખા વેચાણ કરતા 3 શખ્સો ઝડપાયા

સુરત: શહેરના સરથાણા વિસ્તારમાંથી બનાવટી ગુટખા બનાવવાના રેકેટનો પર્દાફાશ કરવામાં આવ્યો છે. જેમાં પોલીસે 3 આરોપીઓને ઝડપી પાડ્યા છે. પોલીસે લાખોની મશીનરી, ગુટખા માટે વપરાતો રોલ સહિત ગુટખાનો જથ્થો ઝડપી પાડી આગળની કાર્યવાહી હાથ ધરી છે.

આ આરોપીઓ વિમલ બ્રાન્ડનો ગેરકાયદેસર ઉપયોગ કરીને માર્કેટમાં બનાવટી ગુટખાનું વેચાણ કરતા હતા. આ રેકેટનો પર્દાફાશ બાતમીના આધારે કરવામાં આવ્યો છે. બુધવારની રાત્રે આ ઈસમોની ધરપકડ કરવામાં આવી છે. બાતમીના આધારે લસકાણા વિસ્તારમાં આવેલી ડાયમંડનગર ઈન્ડ્રસ્ટ્રીયલમાં રેડ પાડીને 3 આરોપીઓને ઝડપી પાડવામાં આવ્યા છે.

સુરતમાંથી ડુપ્લીકેટ ગુટખા બનાવનાર 3 આરોપી ઝડપાયા

પોલીસના હાથે ઝડપાયેલા ઈસમો છેલ્લા કેટલાક સમયથી ડુપ્લિકેટ ગુટખા બનાવતા હત. આ ગુટખા માટે સામાન ક્યાંથી લાવી શહેરમાં ક્યા ક્યા વિસ્તારોમાં સપ્લાઈ કરતા હતા, જેવી વિગતો મેળવવા પોલીસે ગુરૂવારે તમામ આરોપીને કોર્ટમાં રજૂ કરી રિમાન્ડ માટેની તજવીજ હાથ ધરી છે. જો કે આ પહેલા પણ આ પ્રકારની બે ફેક્ટરી સુરતમાંથી પકડાઈ ચૂકી છે. તેવામાં પકડાયેલી નકલી ગુટખા અને બનાવટી ફેક્ટરી સાથે અન્ય આરોપી સંકળાયેલા છે કે કેમ તે દિશામાં પોલીસે તપાસ હાથ ધરી છે.