સાબરકાંઠા: અરવલ્લી જિલ્લાની સરહદ ઉપર ઇડર તાલુકાનું ઝૂમસર ગામ આવેલું છે. 2004માં તળાવથી આગળ 80 ફુટ લાંબા ચેકડેમ બનાવવામાં આવ્યો હતો. જે તળાવની ઊંચાઈ કરતાં ત્રણ મીટર વધારે ઊંચો બાંધવામાં આવ્યો હતો. જોકે, હવે આ ચેકડેમ સમગ્ર ગામ માટે પરેશાનીનો પર્યાય બન્યો છે. સાબરકાંઠા તેમજ અરવલ્લીમાં છેલ્લા એક સપ્તાહમાં થયેલા અતિ ભારે વરસાદના પગલે તળાવ પૂર્ણ સપાટીએ ભરાઇ ગયું હતું. જે પછી પાણી સ્થાનિક ખેડૂતો અને પશુપાલકોની જમીન ઉપર ફળી વળ્યાં છે. જેના પગલે હવે ખેડૂતો માટે ભારે પરેશાનીની શરૂઆત થઈ છે. જોકે, વહીવટી તંત્ર દ્વારા આ મામલે ટૂંક સમયમાં નિર્ણય ન લેવાઇ તો ખેડૂતોએ આત્મવિલોપનની ચીમકી પણ ઉચ્ચારી છે.
સાબરકાંઠાના ઇડર તાલુકાના ઝુમસર ગામનું તળાવ ઓવરફલો, ખેડૂતોએ આપી આત્મવિલોપનની ચીમકી 2004ની સાલમાં વનવિભાગ દ્વારા ઝુમસર ગામના તળાવથી 100 મીટર એસી ફુટ લાંબો ચેકડેમ બનાવવામાં આવ્યો હતો. જોકે, ચેકડેમની ઊંચાઇ તળાવની ઊંચાઈ કરતાં વધુ હોવાના પગલે છેલ્લા કેટલાંક વર્ષોથી તળાવમાં પાણી ભરાવવાની સમસ્યા યથાવત રીતે જોવા મળે છે. જેમાં આ વર્ષે ભારે વરસાદના પગલે તળાવના ક્ષેત્રફળ કરતાં ચાર ગણા વધારે વિસ્તારમાં પાણી ફરી વળ્યા છે. જેના પગલે ખેડૂતોનો પાક સંપૂર્ણપણે નાશ પામ્યો છે. તેમજ આ મામલે વહીવટી તંત્રને વારંવાર રજૂઆત કરવા છતાં હજી સુધી ચોક્કસ નિર્ણય લઈ શકાયો નથી. જોકે, આગામી સમયમાં આ મામલે ઠોસ નિર્ણય ન લેવાય તો સાબરકાંઠા જિલ્લા કલેકટર કચેરીએ ગ્રામજનો તેમજ પશુપાલકો આવેદનપત્ર આપી આત્મવિલોપન કરવાની તૈયારીઓ કરી રહ્યા છે. એક તરફ કિસાનોને તળાવના પાણીને પગલે પારાવાર મુશ્કેલી અને સમસ્યા છે. તો બીજી તરફ સાબરકાંઠા તેમજ અરવલ્લી જિલ્લાની સરહદ વચ્ચે ઝુમસર ગામ પીસાઈ રહ્યું છે. ત્યારે જોવાનું એ છે કે, આગામી સમયમાં સ્થાનિક ગ્રામજનોને ક્યારે ન્યાય મળે છે.
