ધોરણ-10નું પરિણામ જાહેર, ગોંડલની 2 વિદ્યાર્થીનીઓએ ટોપ-10માં મેળવ્યું સ્થાન

રાજકોટઃ ગુજરાત માધ્યમિક શિક્ષણ બોર્ડે આજે ધોરણ 10નું પરિણામ જાહેર કર્યુ છે. જેમાં ગુજરાત બોર્ડનું પરિણામ 66.97 ટકા, રાજકોટ જિલ્લાનું 73.92 ટકા અને ગોંડલનું પરિણામ 72.02 ટકા આવ્યું છે.

ગોંડલની નામાંકિત ગંગોત્રી સ્કૂલનું પરિણામ 91.79 ટકા આવ્યું છે અને આ જ સ્કુલની વિદ્યાર્થીની ઋત્વિ પારખિયાએ સમગ્ર ગુજરાત બોર્ડમાં 99.98 pr સાથે દ્વિતીય સ્થાન અને સોરઠિયા વિશ્વાએ 99.96 pr સાથે સમગ્ર ગુજરાત બોર્ડમાં ચોથું સ્થાન મેળવી ગોંડલ અને શાળાનું નામ રોશન કર્યુ છે. ગંગોત્રી સ્કૂલના વિદ્યાર્થીઓ ધોરણ-10 ના પરિણામમાં 99 pr ઉપર 17 વિદ્યાર્થીઓ, 98 pr ઉપર 30 વિદ્યાર્થીઓ, 97 pr ઉપર 42 વિદ્યાર્થીઓ, 96 pr ઉપર 50 વિદ્યાર્થીઓ, 95 pr ઉપર 60 વિદ્યાર્થીઓ આવ્યા છે. આ રીતે ફરી એક વખત ગંગોત્રી સ્કૂલે પરિણામમાં ઉત્તરોત્તર ઉજ્જવળ પરિણામો લાવવાની પરંપરા જાળવી રાખી છે.

ગોંડલમાં ધોરણ 10 નું શ્રેષ્ઠ પરિણામ આવતા તમામ તેજસ્વી તારલાઓને બિરદાવતું મોટું સરઘસ કાઢવામાં આવ્યું હતું. આ સરઘસમાં ગોંડલના હોદ્દેદારો, અગ્રણીઓ, ઉદ્યોગપતિઓ, શુભેચ્છકો અને નામાંકિત વ્યક્તિઓએ વિદ્યાર્થીઓને શુભેચ્છા પાઠવી હતી. વિદ્યાર્થીની મહેનતને બિરદાવવા ગોંડલના રસ્તા પર ઘણા લોકો પણ સાથે જોડાયા હતા. ગંગોત્રી સ્કૂલનાં મેનેજિંગ ટ્રસ્ટી સંદિપ છોટાળાએ સહુ તેજસ્વી તારલાઓને પોતાના હાથે મીઠુ મોઢું કરાવ્યું હતું. તેમજ આવું શ્રેષ્ઠ પરિણામ લાવનાર તમામ શિક્ષકગણ, મેનેજમેન્ટ ટીમ તેમજ વાલીઓને શુભેચ્છા પાઠવી હતી.

ગંગોત્રી સ્કૂલનાં મેનેજિંગ ટ્રસ્ટી સંદિપ છોટાળાએ જણાવ્યું હતું કે, ગંગોત્રી સ્કૂલ સમગ્ર ગુજરાતમાં અગ્રણ્ય સંસ્થાઓમાં સ્થાન પામી છે. તે તમામ બાબતોનો શ્રેય પરિપક્વ અને અનુભવી આચાર્યશ્રી, નિષ્ણાંત અને સંસ્થાને સમર્પિત શ્રેષ્ઠ સ્ટાફગણ, તેમજ સુમેળ અને સહકારભર્યું વર્તન દાખવતા વાલીઓ તથા મહેનતુ અને આજ્ઞાંકિત વિદ્યાર્થીઓને આભારી છે. ભવિષ્યમાં પણ આવું જ શ્રેષ્ઠ પરિણામ અવિરત મળતું રહેશે.