પાટીલની જાહેરાત બાદ રાજકોટ ભાજપના 10થી વધુ કોર્પોરેટર નહીં લડી શકે ચૂંટણી

સોમવારે યોજાયેલી સંસદી બેઠકમાં ભાજપ પ્રદેશ પ્રમુખ સી. આર. પાટીલે ઉમેદવારોની પસંદગીને લઈને પાર્લામેન્ટરી બોર્ડમાં લેવાયેલા 3 મહત્ત્વના નિર્ણયની જાહેરાત કરી હતી. ભાજપ પ્રદેશ પ્રમુખના આ નિર્ણયને કારણે રાજકોટ ભાજપના 10થી વધુ કોર્પોરેટર્સ ચાલુ વર્ષે યોજાનારી સ્થાનિક સ્વરાજની ચૂંટણી લડી શકશે નહીં.

• 60 વર્ષથી વધુની ઉંમરના કાર્યકરોને ટિકિટ અપાશે નહીં
• 3 ટર્મ સુધી ચૂંટાયેલા વ્યક્તિઓને પણ ટિકિટ મળશે નહીં
• ભાજપના હોદ્દેદારો અને આગેવાનોના સગા સંબંધીઓને ટિકિટ મળશે નહીં
• આ નિર્ણયને કારણે રાજકોટના 10થી વધુ કોર્પોરેટર્સ નહીં લડી શકે ચૂંટણી

રાજકોટ : ગુજરાત ભાજપ પ્રદેશ અધ્યક્ષ સી. આર. પાટીલ દ્વારા મંગળવારે જાહેરાત કરવામાં આવી છે કે, સ્થાનિક સ્વરાજ્યની ચૂંટણીમાં 60 વર્ષથી વધુ ઉંમરના ઉમેદવારને ટિકિટ આપવામાં આવશે નહીં. તેમજ સતત 3 વર્ષથી ચૂંટાઈને આવતા સભ્યોને પણ ટિકિટ આપવામાં આવશે નહીં. ભાજપ પ્રદેશ પ્રમુખના આ નિર્ણયને લઈને રાજકોટ ભાજપના 10 કરતાં વધુ કોર્પોરેટર્સ ચાલુ વર્ષે યોજાનારી સ્થાનિક સ્વરાજની ચૂંટણી લડી શકશે નહીં.

10 કરતા વધુ કોર્પોરેટર્સ નહીં લડી શકે ચૂંટણી

ભાજપ પ્રદેશ પ્રમુખ સી. આર. પાટીલની જાહેરાત બાદ રાજકોટ ભાજપના 10 કરતાં વધુ કોર્પોરેટર્સ સ્થાનિક સ્વરાજની ચૂંટણી લડી શકશે નહીં. જેમાં મીના પારેખ, વિજ્યા વાછાણી, રૂપા શીલુ તેમજ ડૉ. જૈમીન ઉપાધ્યાય સહીતના કોર્પોરેટર્સ 60 વર્ષથી વધુ ઉંમર ધરાવે છે. જ્યારે બાબુ આહિર, અનિલ રાઠોડ, કશ્યપ શુકલ, નીતિન ભારદ્વાજ, કમલેશ મિરાણી, ઉદય કાનગડ આ તમામ હાલના કોર્પોરેટર્સ છે, તેમજ ગત 3 ટર્મથી ચૂંટણી જીતી ચૂકયા છે. જેમને આગામી દિવસોમાં ચૂંટણી લડશે કે કેમ તેના પર સવાલો ઉભા થયા છે.

નવા ચહેરાઓને સ્થાન મળવાની શક્યતાઓ

પાટીલની જાહેરાત બાદ સ્થાનિક સ્વરાજની ચૂંટણીમાં ભાજપમાંથી યુવા ચહેરાઓને ટિકિટ અપાય તેવા સંકેતો દેખાઈ રહ્યા છે. જ્યારે રાજકોટમાં નીતિન ભારદ્વાજ, ડૉ. જૈમિન ઉપાધ્યાય તેમજ ઉદય કાનગડ જેવા દિગગજ નેતાઓ ગત 3 ટર્મથી ચૂંટાઈને આવતા હોય, ચાલુ વર્ષે યોજાનારા આ કોર્પોરેટર્સે સ્વૈચ્છિક સ્થાનિક સ્વરાજની ચૂંટણી નહીં લડે તેવી આ અગાઉ જ જાહેરાત કરી હતી. આ અંતર્ગત રાજકોટમાં પણ ભાજપ દ્વારા નવા ચહેરાઓને મેદાનમાં ઉતારવામાં આવે તો નવાઈ નહીં.

ગાંધીનગર : સ્થાનિક સ્વરાજની ચૂંટણી અંતર્ગત ગુજરાતમાં 06 મહાનગરપાલિકાઓની ચૂંટણી 21 ફેબ્રુઆરીએ યોજાશે. ભારતીય જનતા પાર્ટી દ્વારા ઉમેદવાર પસંદગીને લઈને સેન્સ પ્રક્રિયા પૂરી કરી દેવામાં આવી છે. જેમાં 07 હજાર જેટલા ફોર્મ આવ્યા છે. હવે જેમાંથી સંભવિત ઉમેદવારોને શોર્ટલિસ્ટ કરવા માટે પ્રદેશ ભાજપની પાર્લામેન્ટરી કમિટીની બેઠક સોમવારના રોજ મુખ્યપ્રધાનના નિવાસસ્થાન ગાંધીનગર ખાતે યોજાઇ હતી.

બેઠકમાં ભાજપના અગ્રણીઓ રહ્યા ઉપસ્થિત

આ બેઠકમાં મુખ્ય પ્રધાન વિજય રૂપાણી, નાયબ મુખ્યપ્રધાન નીતિન પટેલ, કેન્દ્રના રાજ્ય કૃષિ પ્રધાન પુરુષોત્તમ રૂપાલા, રાજ્યના કૃષિપ્રધાન આર. સી. ફળદુ , ભાજપ પ્રદેશ પ્રમુખ સી. આર. પાટીલ સહિતના ભાજપના અગ્રણીઓ ઉપસ્થિત રહ્યા હતા. આ બેઠક ત્રણ દિવસ સુધી ચાલશે. જેમાં 06 કોર્પોરેશની 572 બેઠકો માટે ઉમેદવારોની યાદી નક્કી કરવામાં આવશે. જેને છેલ્લી મંજૂરી માટે કેન્દ્રીય પાર્લામેન્ટરી બોર્ડ, દિલ્હી ખાતે મોકલી અપાશે. ત્યારબાદ ઉમેદવારોની ફાઈનલ યાદી જાહેર કરાશે.

આ બેઠકમાં લેવાયા મહત્વના 3 નિર્ણય

સોમવારે યોજાયેલી બેઠકમાં ભાજપ પ્રદેશ પ્રમુખ સી. આર. પાટીલે ઉમેદવારોની પસંદગીને લઈને પાર્લામેન્ટરી બોર્ડમાં લેવાયેલા 3 મહત્ત્વના નિર્ણયની જાહેરાત કરી હતી.

1. 60 વર્ષથી વધુની ઉંમરના કાર્યકરોને ટિકિટ અપાશે નહીં.
2. 3 ટર્મ સુધી ચૂંટાયેલા વ્યક્તિઓને પણ ટિકિટ મળશે નહીં.
3. ભાજપના હોદ્દેદારો અને આગેવાનોના સગા સંબંધીઓને ટિકિટ મળશે નહીં.

જેની પાછળનો ઉદ્દેશ યુવા ચહેરાઓને આગળ લાવવાનો છે. સ્થાનિક સ્વરાજયની ચૂંટણીઓમાં લોકસંપર્ક ખૂબ જ મહત્વનો છે. યુવાઓ તે વધુ સારી રીતે કરી શકશે.

બેઠકને લઈને વિવાદ સર્જાવાની શકયતા

ભાજપના આ નિર્ણયથી સિનિયર કાર્યકરોમાં અસંતોષ ઊભો થશે. બીજી તરફ ભાજપની ચૂંટણી સમિતિની બેઠકમાં વિધાનસભાના અધ્યક્ષ રાજેન્દ્ર ત્રિવેદીની હાજરીએ પણ વિવાદનો વંટોળ સર્જ્યો છે. જોકે, આ અગાઉ પણ ભાજપે અનેક વખત નિર્ણય લીધા બાદ પલટી મારી છે. ત્યારે આ નિર્ણય પર પક્ષ કેટલો અડગ રહેશે, તે ઉમેદવારોની યાદી જાહેર થયા બાદ જ ખબર પડશે.