પોરબંદર શહેરમાં છેલ્લા થોડા સમયથી રોગચાળાએ માથું ઉચક્યું છે, ત્યારે પોરબંદરના લકડી બંદરમાં મચ્છીના દંગામાં કામ કરતો એક નેપાળી યુવાન જીત બહાદુર થારું ઉં. ૪૩નું શંકાસ્પદ ડેન્ગ્યુના કારણે મોત થયું હતું. યુવાનના પરિવારજનોએ જણાવ્યું હતું કે, તેને એક અઠવાડિયા પહેલા તાવ આવતા પ્રથમ સિવિલ હોસ્પિટલમાં સારવાર અર્થે ખસેડ્યો હતો. જ્યાં ત્રણ દિવસની સારવાર બાદ સ્થિતિ કથળતા શહેરની ખાનગી હોસ્પિટલ ખાતે ખસેડવામાં આવ્યો હતો. જ્યાં તેનો રીપોર્ટ કઢાવતા ડેન્ગ્યુ પોઝીટીવ હોવાનું સામે આવ્યું હતું અને સારવાર દરમિયાન તેનું મોત થયું હતું. મૃતકના પરિવારમાં પત્ની ઉપરાંત બે પુત્ર અને એક પુત્રી હોવાનું જાણવા મળ્યું છે.
પોરબંદરમાં શંકાસ્પદ ડેન્ગ્યુના કારણે એકનું મોત ઉલ્લેખનીય છે કે, વરસાદ બાદ પોરબંદર શહેરમાં ઠેર-ઠેર ગંદકીના ગંજ જામ્યા છે અને વિવિધ જગ્યાએ વરસાદી પાણીનો ભરાવો પણ થયો હતો. જેના કારણે મચ્છરોનો ઉપદ્રવ વધતા લોકોમાં તાવ, શરદી, ઉધરસ જેવા રોગોનું પ્રમાણ વધ્યું છે. શહેરમાં મધ્યમાં આવેલા ખીજડી પ્લોટ સહીતના મેદાનોમાં પણ હજુ વરસાદી પાણી ભર્યા છે. મનપાના સફાઈ કામદારો જાણે હડતાલ પર ઉતર્યા હોય તેમ ઠેર-ઠેર ગટરો ઉભરાઈ રહી છે અને શહેરના રાજમાર્ગો પર પણ ગટરના ગંદા પાણી વહી રહ્યા છે. પોરબંદર સિવિલ હોસ્પિટલ દર્દીઓથી ઉભરાઈ રહી છે અને દર્દીઓની હોસ્પિટલની બહારના ભાગ સુધી લાંબી કતારો જોવા મળે છે.
સિવિલ હોસ્પિટલમાં છેલ્લા પંદર દિવસમાં શરદી, ઉધરસ અને વાઈરલ ફીવરના કુલ ૧૫૦૦થી વધુ કેસો નોંધાયા હતાં. તો મેલેરિયાના ૨ કેસ પોઝીટીવ આવ્યા હતાં અને ડેન્ગ્યુંનો એક કેસ તેમજ ટાઈફોઈડના ૩ જેટલા કેસ પોઝીટીવ નોંધાયા હતાં. તો શહેરની અનેક ખાનગી હોસ્પિટલો પણ વિવિધ સીઝનલ બીમારીના દર્દીઓથી ઉભરાઈ રહી છે, ત્યારે હજુ પણ રોગચાળો વધુ વકરવાની શક્યતાઓ વર્તાઈ રહી છે, ત્યારે તંત્ર હજુ ગાઢ નીંદ્રામાં પોઢી રહ્યું છે.
