Published : Jan 3, 2024, 4:08 PM IST
પાટણઃ ઉત્તર ગુજરાતનું મહત્વના શહેર પાટણમાં આજે વહેલી સવારે ઝાકળ અને ગાઢ ધુમ્મસનું વાતાવરણ જોવા મળ્યું હતું. આખા પાટણમાં હિલ સ્ટેશન જેવું વાતાવરણ સર્જાયું હતું. સ્થાનિકો એ આહલાદક વાતાવરણની મજા માણી હતી. પાટણના વાતાવરણમાં ઝાંકળના ટીપા જોવા મળ્યા હતા. જો કે આ ધુમ્મસને પરિણામે વાતાવરણમાં વિઝિબિલિટી ઓછી થઈ જતા વાહનચાલકોને તકલીફ પડી હતી.
વાતાવરણમાં પલટોઃ શિયાળા બાદ પ્રથમવાર પાટણમાં વાતાવરણમાં પલટો જોવા મળ્યો હતો. 2 દિવસથી પાટણમાં હાડ થીજવતી ઠંડી પડી રહી છે. પાટણવાસીઓ ગરમ કપડા અને તાપણાનો સહારો લઈને ઠંડી સામે રક્ષણ મેળવી રહ્યા હતા. તેવામાં અચાનક જ વાતાવરણમાં પલટો જોવા મળ્યો હતો. વહેલી સવારે સર્વત્ર ઝાકળનું સામ્રાજ્ય છવાઈ ગયું હતું. ઠેર ઠેર ઝાંકણ પાણીના ટીપા સ્વરુપે ઉપસી આવી હતી. આકાશમાં ગાઢ વાદળા છવાઈ ગયા હતા. જેના લીધે સમગ્ર વાતાવરણ આહલાદક બની ગયું હતું. આખું પાટણ જાણે કોઈ હિલ સ્ટેશન હોય તેવો અનુભવ સ્થાનિકોને થયો હતો.
વાહનચાલકોને તકલીફઃ હવામાનમાં આવેલા પરિવર્તનને લીધે વાતાવરણમાં વિઝિબિલિટી ઓછી થઈ હતી. જેનાથી વાહન ચાલકોને તકલીફ પડી હતી. જેમાં વાહન ચાલકોએ દિવસે પણ હેડ અને ટેલ લાઈટ ચાલુ રાખીને ડ્રાઈવિંગ કરવું પડ્યું હતું. આ ધુમ્મસને લીધે અપડાઉન કરતા નોકરિયાત અને વિદ્યાર્થી વર્ગને પણ ટાઈમિંગ જાળવવામાં મુશ્કેલીઓ પડી હતી. સામાન્ય જનજીવન પણ પ્રભાવિત થયું હતું, કારણ કે વહેલી સવારની ઝાકળ અને ધુમ્મસ સવારે 9 કલાક સુધી વાતાવરણમાં જોવા મળ્યા હતા.