પાટણ જિલ્લા પંચાયતના નવા પ્રમુખ ઉપપ્રમુખની કરાઈ વરણી

પાટણ જિલ્લા પંચાયતના પ્રમુખ અને ઉપપ્રમુખની વરણી માટેની ચૂંટણી પ્રક્રિયા જિલ્લા પંચાયતના સ્વર્ણિમ હોલ ખાતે કલેક્ટર સુપ્રીત સિંઘ ગુલાટીના અધ્યક્ષસ્થાને યોજાઇ હતી. જેમાં ભાજપ તરફથી પ્રમુખ અને ઉપપ્રમુખ માટેની ઉમેદવારી બુધવારના રોજ નોંધાવી હતી, ત્યારે ગુરુવારે ચૂંટણી પ્રક્રિયા પહેલાં જ વિપક્ષના સભ્યોએ સમય કરતા ચૂંટણી મોડી શરૂ થઇ હોવાના મુદ્દે વિરોધ નોંધાવી સભામાથી વોકઆઉટ કર્યું હતું. ત્યારબાદ ચૂંટણી પ્રક્રિયા હાથ ધરવામાં આવી હતી. જેમાં ચૂંટાયેલા 21 સભ્યોએ હાથ ઊંચો કરી મતદાન કરતાં કલેક્ટરે પ્રમુખ તરીકે ભાનુમતી મકવાણા અને ઉપપ્રમુખ તરીકે સાંકાજી ઠાકોરની વરણી કરતાં તમામ સભ્યોએ તેણને આવકાર્યા હતા.

• જિલ્લા પંચાયતના પ્રમુખ ઉપપ્રમુખની વરણી
• કલેક્ટરના અધ્યક્ષસ્થાને યોજાઈ ચૂંટણી
• પ્રથમ સભામાં જ વિપક્ષે નોંધાવ્યો વિરોધ
• સમય કરતા મોડી ચૂંટણી શરૂ થતાં વિપક્ષે કર્યો હોબાળો
• નવનિયુક્ત પ્રમુખ ઉપપ્રમુખને સભ્યોએ આવકાર્યા

પાટણઃ જિલ્લા પંચાયતની 32 બેઠકો માટેની ચૂંટણી થયા બાદ ચૂંટણીના પરિણામો જાહેર થતાં ભાજપે 21 બેઠકો સાથે સ્પષ્ટ બહુમતી હાંસલ કરી હતી, જ્યારે કોંગ્રેસનો ૧૧ બેઠકો ઉપર વિજય થયો હતો. ત્યારબાદ પાટણ જિલ્લા પંચાયતના પ્રમુખની બેઠક અઢી વર્ષ માટે અનુસૂચિત જાતિ મહિલા માટે અનામત હોઈ ભાજપમાંથી બીલીયા બેઠક ઉપર ચૂંટાયેલા ભાનુમતી મકવાણાએ ઉમેદવારી નોંધાવી હતી, જ્યારે ઉપપ્રમુખ માટે સાંકાજી ધુડાજી ઠાકોરે ઉમેદવારી નોંધાવી હતી. પ્રમુખ અને ઉપપ્રમુખની વરણી કરવા માટે ગુરુવારે જિલ્લા પંચાયત સ્વર્ણિમ હોલ ખાતે કલેક્ટર સુપ્રીતસિંઘ ગુલાટીના અધ્યક્ષ સ્થાને બેઠક મળી હતી, પરંતુ ચૂંટણી યોજાય તે પહેલાં જ વિપક્ષના સભ્યોએ નિર્ધારિત સમયે પ્રમુખ અને ઉપપ્રમુખની ચૂંટણી શરૂ ન થવાના મુદ્દે હોબાળો મચાવી જિલ્લા કલેકટર ઉપર ગંભીર આક્ષેપો કરી સભામાંથી વોકઆઉટ કર્યું હતું.

આ પણ વાંચોઃ કચ્છ જિલ્લા પંચાયતના હોદ્દેદારો માટે ભાજપે નામ જાહેર કર્યા

ફૂલહાર પહેરાવી મોં મીઠું કરાવ્યું

કલેક્ટરે પ્રમુખ પદ માટે ભાનુમતી મકવાણા અને ઉપ પ્રમુખ માટે સાંકાજી ઠાકોરની વરની માટે મતદાન પ્રક્રિયા શરૂ કરી હતી. જેમાં જિલ્લા પંચાયતના ભાજપના ચૂંટાયેલા 21 સભ્યોએ પોતાનો હાથ ઊંચો કરી મતદાન કર્યું હતું. જેથી કલેક્ટરે જિલ્લા પંચાયતના પ્રમુખ તરીકે ભાનુમતિ મકવાણા અને ઉપપ્રમુખ તરીકે સાંકાજી ઠાકોરની વરણી કરતા તેમના શુભેચ્છકો અને સમર્થકોમાં આનંદ છવાયો હતો. આ સાથે જ ભાજપના આગેવાનો કાર્યકરોએ પ્રમુખ અને ઉપપ્રમુખને ફૂલહાર પહેરાવી મોં મીઠું કરાવી અભિનંદન પાઠવ્યા હતા.

આ પણ વાંચોઃજૂનાગઢ જિલ્લા પંચાયતના પ્રમુખ તરીકે ભાજપના શાંતાબેન ખટારીયાની બિનહરીફ વરણી

જિલ્લા પંચાયતના નવનિયુક્ત મહિલા પ્રમુખ ભાનુમતી મકવાણાએ જિલ્લા પંચાયતના તમામ સભ્યોને સાથે રાખી વિકાસ લક્ષી કામોને વેગ આપી જિલ્લાનો સર્વાંગી વિકાસ કરવાની નેમ વ્યક્ત કરી હતી