નવસારીમાં પેટ્રોલ-ડીઝલના ભાવ વધારાનો અનોખો વિરોધ, કોંગી કાર્યકરોએ બળદગાડા સાથે રેલી યોજી

ક્રૂડ ઑઈલના ભાવ નીચા હોવા છતાં સરકાર દ્વારા પેટ્રોલ-ડીઝલની કિંમતમાં સતત ભાવ વધારો કરી રહી છે. જેના કારણે આજે સોમવારે વાંસદા તાલુકામાં કોંગ્રેસે બળદગાડા સાથે ઉગ્ર રોષ ઠાલવી સૂત્રોચ્ચાર કરી વિરોધ પ્રદર્શન કર્યું હતું અને વાંસદા મામલતદારને સાથે રાખી રાષ્ટ્રપતિને આવેદનપત્ર પાઠવ્યું હતું.

નવસારીઃ ભારતમાં કોરોના મહામારીને કારણે લોકડાઉન બાદ અર્થતંત્ર પર માઠી અસર થઈ છે. ખાસ કરીને ગરીબ અને મધ્યમવર્ગીય પરિવારોને આર્થિક મુશ્કેલીઓમાંથી પસાર થવું પડ્યું છે. ત્યારે ‘પડ્યા પર પાટું’ જેવી સ્થિતિ લોકોની થઇ છે. આ બધા વચ્ચે સરકાર પેટ્રોલ-ડીઝલના ભાવ વધારો કરી રહી છે. ક્રૂડ ઑઇલના ભાવ ઓછા હોવા છતાં પેટ્રોલ અને ડીઝલના ભાવ વધીને 80 રૂપિયા નજીક પહોંચ્યા છે, ત્યારે નવસારી જિલ્લાના આદિવાસી પટ્ટાના વાંસદામાં આજે સોમવારે કોંગી ધારાસભ્ય અનંત પટેલની આગેવાનીમાં કોંગ્રેસીઓએ બળદગાડા સાથે ઉગ્ર વિરોધ પ્રદર્શન કર્યું હતું.

બળદગાડા સાથે રેલી યોજી

સમાચારના મહત્વના મુદ્દા

• પેટ્રોલ-ડીઝલના ભાવ વધારાને કારણે મધ્યમવર્ગીય લોકો મુશ્કેલીમાં મૂકાયા
• ભાવ વધારાને લઇ નવસારી કોંગ્રેસ દ્વારા અનોખો વિરોધ
• કોંગી કાર્યકરોએ બળદગાડા સાથે રેલી યોજી
• કાર્યકરોએ રાષ્ટ્રપતિને આવેદન પાઠવ્યું

આ વિરોધ પ્રદર્શનમાં કોંગ્રેસીઓએ પેટ્રોલ-ડીઝલના ભાવ પાછા ખેંચવા માટે ઉગ્ર સૂત્રોચ્ચાર કરી રેલી યોજી હતી. જો કે, બળદગાડા સાથે લાવવાની કોંગ્રેસીઓની યોજના પર વાંસદા પોલીસે પાણી ફેરવ્યું હતું અને બળદગાળાને અટકાવ્યા હતા.

કોંગ્રેસીઓ વાંસદા મામલતદાર કચેરીએ પહોંચ્યા બાદ મામલતદાર સહિત રાષ્ટ્રપતિને આવેદનપત્ર પાઠવી, પેટ્રોલ-ડીઝલના ભાવ પાછા ખેંચવાની માંગ કરી હતી. સાથે જ સરકારની નીતિ આદિવાસીઓને આદિવાસી યુગમાં મોકલવાની હોવાના આક્ષેપો કર્યા હતા. જ્યારે કોંગ્રેસીઓના આવેદનપત્રને સરકાર સુધી પહોંચાડવાની મામલતદારે ખાતરી આપી હતી.

મામલતદારને પાઠવ્યું આવેદન