નવસારીના એક ગામમાં રસ્તા પર અનેક મૃત મરઘીઓ મળી આવી

નવસારીના એક ગામના રસ્તા પર પોલ્ટ્રી ફાર્મના સંચાલક દ્વારા મૃત મરઘીઓ ફેંકવામાં આવી હતી. જેને લઈ ગ્રામજનોમાં રોષ જોવા મળી રહ્યો છે. ગ્રામજનોએ આ સંચાલકને શોધી તેની સામે કડક કાર્યવાહી કરના માગ કરી છે. તો બીજી બાજુ લોકોમાં રોગચાળો થવાનો ભય ફેલાયો છે.

નવસારી: કોરોના વાઈરસની માહામારીના ભયથી નોનવેજ ખાનારાઓની સંખ્યા હાલમાં ઘટી છે. આ સાથે જ તંત્ર દ્વારા પોલ્ટ્રી ફાર્મ સંચાલકોને મરઘાઓનો યોગ્ય નિકાલ કરવાની સૂચના પણ અપાઈ છે. પણ હજુ ઘણા પોલ્ટ્રી ફાર્મ ચાલુ છે. તેવા સંજોગોમાં ચીખલીના તલાવચોરા ગામના મુખ્ય રસ્તા નજીક મોટી સંખ્યામાં મૃત મરઘાઓ હોય જેથી ગ્રામીણોમાં રોષ સાથે જ રોગચાળો ફેલાવવાની ભીતી સેવાઈ રહી છે.

કોરોના વાઈરસની મહામારીએ સમગ્ર વિશ્વને પોતાના રાક્ષસી ભરડામાં લઈ લીધું છે. કોરોનાનો ફેલાવો રોકવા તંત્ર દ્વારા વિભિન્ન સાવચેતીના પગલા લેવામાં આવ્યા છે. જેમાંથી એક નવસારી જિલ્લાના પોલ્ટ્રી ફાર્મ સંચાલકોને સ્થિતિને ધ્યાને લઇ ફાર્મ ખાલી કરી બંધ કરી દેવાની સુચના આપવામાં આવી છે. બીજી તરફ લોકોમાં મરઘાને લઇ ફેલાયેલી અફવાઓને કારણે નોનવેજ ખાનારા લોકોની સંખ્યા પણ ઓછી થઇ છે.

તેવામાં ચીખલી તાલુકાના આજુ-બાજુના ગામોમાં તંત્રનાં આદેશનું ઉલ્લંઘન કરી પોલ્ટ્રી ફાર્મ ધમધમી રહ્યા છે. તે દરમિયાન ચીખલી તાલુકાના તલાવચોરા ગામના મુખ્ય રસ્તાથી રોહિતવાસ તરફ જતા જાહેર માર્ગની બાજુમાંથી મૃત મરઘીઓ મળી આવી હતી. જેના પગલે ગંદકી પણ ફેલાઈ હતી. જેને લઈને ગ્રામજનોમાં રોષ ફેલાયો છે.

ગ્રામજનોમાં મૃત મરઘાઓને કારણે રોગચાળો ફાટી નીકળવાની ભીતી સેવાઈ રહી છે, ત્યારે મૃત મરઘાઓને કયા પોલ્ટ્રી ફાર્મના સંચાલકે ખુલ્યામાં ફેંક્યા છે તે અંગેની તપાસ કરી તંત્ર સંચાલક સામે કાયદેસરની કાર્યવાહી કરે એવી ગ્રામજનોમાં માગ ઉઠી છે.