નર્મદા/કેવડીયા: સરદાર સરોવર ડેમમાં ઓમકારેશ્વર ડેમ અને ઈન્દિરાસાગર ડેમમાંથી 10.15 લાખ ક્યુસેક પાણી છોડવામાં આવ્યું હતું. જેથી નર્મદા બંધની જળ સપાટી વધતા તંત્ર એલર્ટ થયું હતું. તંત્ર દ્વારા 5 મીટરથી 23 દરવાજા ખોલી નાખવામાં આવ્યા છે. જેમાંથી 8 લાખ 50 હજાર ક્યુસેક પાણી નદીમાં છોડાઇ રહ્યું છે. હાલ નર્મદા ડેમની જળ સપાટી 131.12 મીટર પર પહોંચી છે.
ઉપરવાસમાંથી વિપુલમાત્રામાં આવી રહેલા પાણીના પ્રવાહને લઇને વડોદરા, ભરૂચ અને નર્મદા જિલ્લાના નદીકિનારાના 52 ગામોને એલર્ટ કરવામાં આવ્યાં છે. જેમાં ભરૂચના 21, વડોદરાના 12 અને નર્મદાના 19 ગામોને સાવચેત રહેવાની સૂચના આપવામાં આવી છે, તેમજ નર્મદાના 15 લોકોને સ્થળાંતર કરવામાં આવ્યા છે. ભરૂચ અને વડોદરાના ડભોઇ તાલુકામાં NDRFની 1-1 ટીમ પણ તૈનાત કરવામાં આવી છે.
આ અંગે DYSP ચિરાગ પટેલે જણાવ્યું હતું કે, નર્મદાના 12 ગામોને નદીનો પ્રવાહ વધવાને કારણે SRPFના 120 જવાનો, પોલીસના 25 જવાનો સાથે નર્મદા નદી પાસે આવેલા ગામો અને નર્મદા ડેમ પર સુરક્ષા વ્યવસ્થા વધારી દેવામાં આવી આવી છે.