મોરબીમાં પાલિકાનું બજેટ બોર્ડ નામંજૂર થતાં રાજકારણ ગરમાયું

મોરબી માળિયા બેઠક પર બ્રિજેશ મેરજાએ કોંગ્રેસમાંથી રાજીનામું આપ્યાં બાદ ભાજપમાં જોડાયાં હતાં અને હવે ખાલી પડેલી બેઠક પર પેટાચૂંટણી યોજાનારી છે ત્યારે મોરબીના સ્થાનિક રાજકારણમાં ગરમાવો જોવા મળી રહ્યો છે. પાલિકામાં બજેટ નામંજૂર થતાં ભાજપ-કોંગ્રેસ બંને પક્ષો એકબીજા પર આક્ષેપબાજી કરી રહ્યાં છે.

મોરબીઃ મોરબી જિલ્લા ભાજપ અધ્યક્ષ રાઘવજીભાઈ ગડારાએ કોંગ્રેસની નિષ્ફળતા અંગે પ્રહારો કરી જણાવ્યું કે, મોરબી નગરપાલિકાનું બજેટ બોર્ડ તાજેતરમાં મળેલું જેમાં કોંગ્રેસ શાસિત નગરપાલિકાના કોંગ્રેસના જ ચૂંટાયેલા સદસ્યો ગેરહાજર રહી બજેટ મંજૂર થવા દીધું નથી. બોર્ડમાં બજેટ મંજૂર થાય તો શહેરની પ્રજાના વિકાસલક્ષી કાર્યો થઇ શકે. ગુજરાત સરકાર દ્વારા નગરપાલિકાને કરોડો રૂપિયાની ગ્રાન્ટ ફાળવવામાં આવી છે અને નગરપાલિકાના ભંડોળમાં કરોડો રૂપિયા જમા હોય તેમ છતાં બજેટ મંજૂર ન થતાં હાલ ચાલી રહેલી કોરોના મહામારી તેમ જ અતિવૃષ્ટિ જેવી વિકટ પરિસ્થિતિમાં પણ કોંગ્રેસના પાપે આ કરોડો રૂપિયાના ભંડોળનો ઉપયોગ વિકાસના કામો માટે થઈ શકતો નથી.

મોરબીમાં પાલિકાનું બજેટ બોર્ડ નામંજૂર થતાં રાજકારણ ગરમાયું

ભારતીય જનતા પાર્ટીના ચૂંટાયેલા સદસ્યો પણ પ્રજાના હિતમાં અને વિકાસના કામ માટે બજેટ મંજૂર કરાવવા પૂરેપૂરો સહકાર આપવા તૈયાર હોય પરંતુ જે સત્તા ઉપર છે તે કોંગ્રેસ પાર્ટીના ચૂંટાયેલા સદસ્યો જ બોર્ડમાં ગેરહાજર રહી કેમ બજેટ મંજૂર થવા દેતાં નથી ? તેવો સવાલ કર્યો હતો. આ બાબતે જિલ્લા કોંગ્રેસ પ્રમુખ, શહેર કોંગ્રેસ પ્રમુખને ખબર નથી. તેમ જ જો જાણ હોય તો ગેરહાજર સભ્ય સામે કડક પગલાં કેમ નથી લેવાયાં તેવા પ્રશ્નો પૂછ્યાં છે અને કોંગ્રેસ પાર્ટી પ્રજા સમક્ષ મત માગવા જશે ત્યારે પ્રજા તેને પ્રશ્ન પૂછશે તેમ પણ જણાવ્યું હતું.

તો મોરબી શહેર કોંગ્રેસ સમિતિ પ્રમુખ રામજીભાઈ રબારીએ જણાવ્યું છે કે મોરબી નગરપાલિકાનું વર્ષ 20-21 ના વર્ષનું બજેટ કોંગ્રેસ દ્વારા 17 માર્ચના રોજ એકઝી. કમિટીની બેઠકમાં સર્વાનુમતે મંજૂર કરવામાં આવ્યું હતું. પરંતુ 24 ઓગસ્ટના રોજ મળેલી જનરલ બોર્ડમાં જિલ્લા ભાજપ પ્રમુખ રાઘવજીભાઈએ કોંગ્રેસી કાઉન્સિલરોને લોભ, લાલચ, પદ-પૈસા આપીને ગેરહાજર રાખવામાં સફળ થયાં. હવે ચોરની મા કોઠીમાં મો સંતાડીને રુદન કરે છે. ખરેખર ભાજપ પાસે સ્પષ્ટ બહુમતી હતી છતાં જાણીબૂઝીને મોરબીવાસીઓને યેનકેન પ્રકારે વિકાસના કામોથી વંચિત રહે માટે શકુનિની શતરંજ ગોઠવી સોગઠાબાજીથી બજેટ નામંજૂર કરાવ્યું. આખરે સત્ય બહાર આવતાં દોષનો ટોપલો કોંગ્રેસ પર નાખવાના બાલીશ પ્રયત્નો કરી હવાતિયા મારી રહ્યાં છે.