મોરબીમાં ઉનાળાના પૂર્વે ગરમીનું તાપમાન વઘ્યું

મોરબીઃ ઉનાળાના પ્રારંભે જ સૂર્યદેવનું રૌદ્ર સ્વરૂપ જોવા મળી રહ્યું છે. ગરમીનો પારો ઉપર ચડી રહ્યો છે. ત્યારે કાળઝાળ ગરમીમાં મોરબી જિલ્લાના નાગરિકોને સનસ્ટ્રોક (લુ) થી બચવા માટેની માર્ગદર્શિકા આરોગ્ય તંત્રએ જાહેર કરી છે. મોરબી જીલ્લા મુખ્ય આરોગ્ય અધિકારી ડો.જે એમ કતીરા દ્વારા જાહેર કરાયેલ માર્ગદર્શિકામાં જાહેર જનતાને માર્ગદર્શન આપવામાં આવ્યું હતું.

જેમાં ગરમીમાં સફેદ સુતરાઉ ખુલતા કપડા પહેરવા, ચશ્મા, ટોપી, છત્રીનો માથું ઢંકાય તેવી રીતે ઉપયોગ કરવો. ઘરની બહાર જવા પહેલા આખું શરીર ઢાંકવું અને માથું ખુલ્લુંના રહે તેની કાળજી રાખવી. આ સાથે જ સીધા સૂર્યપ્રકાશથી બચવું અને દિવસ દરમિયાન ઝાડની છાયામાં અને ઠંડકમાં રહેવું.

દિવસ દરમિયાન પુષ્કળ પ્રમાણમાં પાણી, પ્રવાહી પીવું અને શક્ય હોય તો લીંબુ સરબત પીવું જોઈએ, ભીના કપડાથી માથું ઢાંકીને રાખવું અને જરૂર જણાયે અવારનવાર ભીના કપડાથી શરીર લૂછવું. નાના બાળકો, સગર્ભા માતાઓ, વૃધ્ધો અને અશક્ત તેમજ બીમાર વ્યક્તિઓએ તડકામાં વિશેષ કાળજી લેવા જણાવ્યું છે. આકરા તાપમાં શક્ય હોય ત્યાં સુધી બહાર જવાનું ટાળવું તેવુ આરોગ્ય વિભાગ જણાવ્યુ છે.