ઊંઝા વિધાનસભા પેટા ચૂંટણીમાં NCPએ ઉમેદવાર ઉતારતા ત્રિપાંખીયો જંગ જામશે

મહેસાણા: લોકસભા ચૂંટણીની સાથે ઊંઝા વિધાનસભાની પેટા ચૂંટણી યોજાશે. જેમાં ભાજપ, કોંગ્રેસ અને NCP વચ્ચેનો ત્રિપાંખીયો જંગ જામશે. નોંધનીય છે કે, બે મહત્વના રાજકીય પક્ષો અને ઠાકોર સમાજની મહત્વકાંક્ષા પર ચૂંટણીમાં ઉભેલા ઉમેદવારને જીતની આશા બાંધતી હોય છે.

ઊંઝામાં કોંગ્રેસમાંથી ચૂંટાયેલા આશા પટેલે કોંગ્રેસ છોડી ભાજપના કેસરિયા ધારણ કરતા આ ચૂંટણી તેઓ ભાજપ માંથી લડી રહ્યા છે, ત્યારે કોંગ્રેસને ટેકો આપનારી ઠાકોર સેનાના આગેવાનોએ પણ કોંગ્રેસે કામું પટેલને ટિકિટ આપતા નારાજગી જતાવતા સેનાના પ્રમુખ નટુજી ઠાકોર NCPમાંથી ચૂંટણી લડી રહ્યા છે.

નટુજી ઠાકોરે બુધવારે ઊંઝા ખાતે પોતાના ચૂંટણી લક્ષી કાર્યાલયનું પ્રદેશ NCP મહામંત્રી અને પ્રવક્તા નિકુલસિંહના હસ્તે ઉદ્ઘાટન કરી ચૂંટણીમાં પ્રચારની ગતિ વધારી છે. જો કે, આજના આ કાર્યક્રમમાં અલ્પેશ ઠાકોર અને NCP ઉમેદવાર વચ્ચેની ખાનગી બાબતો મીડિયા સમક્ષ સામે આવી છે. જેમાં કોંગ્રેસ સાથે છેડો ફાડનાર નેતા અલ્પેશ ઠાકોર ઊંઝા વિધાનસભા પેટા ચૂંટણીમાં NCPના ઉમેદવાર નટુજી ઠાકોરને જીતાડવા આવનારી 15મી એપ્રિલે ઊંઝા મતવિસ્તારમાં જંગી સભા સંબોધન કરવાના છે.