સોશિયલ મીડિયામાં જાહેરાત જોઈ ફોન કરનારા મહેસાણાના યુવક સાથે હરિયાણાના યુવકે 5 લાખ ખંખેર્યા

સોશિયલ મીડિયામાં જાહેરાત જોઈને છઠિયારડા ગામના યુવકે વિદેશના વિઝા કરવા માટે હરિયાણાના રુપિયા આપ્યા હતા. બાદમાં કંઈ જ પ્રોસેસ ન થતા છેતરાયેલા યુવકે મહેસાણા તાલુકા પોલીસ મથકે ગુનો નોંધાવ્યો છે.

• મહેસાણાના યુવક સાથે હરિયાણાના યુવકે 5 લાખ ખંખેર્યા
• ફેસબુક પર આવેલી જાહેરાત પર ભરોસો કરવો ભારે પડ્યો
• હરિયાણાના ઠગબાજ સામે સાયબર ક્રાઈમનો ગુનો નોંધાયો

મહેસાણા: જિલ્લાના છઠિયારડા ગામના યુવકે લોકડાઉનમાં પોતાના વતન આવ્યા બાદ વિદેશ જવા માટે પ્રયત્ન કર્યા હતાં. જેમાં ઇન્ટરનેટની દુનિયામાં સર્ચ કરતા ફેસબુક પર કેનેડા વર્ક પરમીટ અપાવતી એજન્સીની જાહેરાત જોઈ કોલ કર્યો હતો. ત્યારબાદ હરિયાણાના એક યુવકનો સામેથી કોલ આવ્યો હતો અને 1500 રૂપિયા લઈ રજીસ્ટ્રેશન કરવાનું ષડયંત્ર રચ્યું હતું. જેમાં ફસાયેલો યુવક ઠગબાજના સકંજામાં આવ્યાનું જાણ્યા વિના જ વિદેશ જવાના ઉત્સાહમાં કુલ 5,62,957 રૂપિયા ઓનલાઈન ટ્રાન્જેક્શન કર્યા હતાં. સમય જતાં કોઈ વિઝા ન મળતા કે કોઈ પ્રોસેસ આગળ ન વધતા ભોગ બનનારે પોતે છેતરાયાનો અહેસાસ થતા મહેસાણા તાલુકા પોલિસ મથકે ફરિયાદ નોંધાવી આરોપી સામે કાર્યવાહીની માગ કરી છે.

વર્લ્ડ એસોસિએશન દિલ્હી વિઝા કન્સલ્ટન્સીના નામે ચૂનો લગાવાયો....!

એક વર્ષ અગાઉ ફેબ્રુઆરી માસમાં જ છઠિયારડા ગામના યુવકે ફેસબુક પર વર્લ્ડ એસોસિએશન દિલ્લી વિઝા કન્સલ્ટન્સી નામની જાહેરાત જોઈ વિશ્વાસ મૂકી કેનેડા વર્ક પરમીટ સાથે વિઝા માટે રજીસ્ટ્રેશન ફી ભરી હતી. બાદમાં હરિયાણાના ઠગબાજે દસ્તાવેજ મંગાવ્યા હતા અને વિઝા પ્રક્રિયાના નામે હપ્તેથી પેટીએમ અને બેન્ક એકાઉન્ટમાંથી 5.62 લાખથી વધુની રકમ ટ્રાન્સફર કરી લીધી હતી. ત્યારબાદ વિઝા કે પ્રક્રિયા ન થતી હોવાનું અનુભવતા નાણાં પરત માંગવા છતાં પરત ન મળતા ભોગ બનનારા યુવકે મહેસાણા તાલુકા પોલીસ મથકે હરિયાણાના યુવક વિરુદ્ધ IPC 406, 420 અને IT એકટની કલમ 66-D મુજબ ગુનો નોંધી વધુ તપાસ હાથ ધરી છે.