લો બોલો, ભાજપ પદાધિકારીને પોલીસ પણ ન રોકી શકી, એમ્બ્યૂલન્સ પણ લાચાર!

મહેસાણા જિલ્લા પંચાયતના પ્રમુખ સહિતના હોદ્દેદારોની હજુ આજે તો વરણી જ થઈ છે. ત્યાં તો આ જનપ્રતિનિધિઓ પહેલા દિવસે જ જાણે પદ પચાવી ન શકતાં હોય તેવું જોવા મળ્યું હતું. ભાજપના પદાધિકારીઓએ માસ્ક વિના જ રોડ શો કાઢ્યો હતો. રોડ શોના લીધે 108 એમ્બ્યૂલન્સ પણ અટવાઈ ગઈ હતી.

• મહેસાણા જિલ્લા પંચાયત પદાધિકારીઓ નિરંકુશ બન્યાં
• પહેલા જ દિવસે રોડ શો કર્યો, ગાઈડલાઈનનો ખુલ્લેઆમ ભંગ
• રોડ શોના ટ્રાફિકને લીધે એમ્બ્યૂલન્સ પણ અટવાઈ ગઇ

મહેસાણાઃ મહેસાણા જિલ્લા પંચાયતમાં આજે પ્રમુખ અને ઉપપ્રમુખ સહિતના હોદ્દેદારોની નિમણૂક કરાઈ છે, ત્યાં હોદ્દા પર આવતાંની સાથે જ પહેલાં દિવસે જિલ્લા પંચાયતના ઉપપ્રમુખ અંબારામ ઠાકોરે પોતાના સમર્થકો સાથે DJ સાથે અને ઓપન જીપમાં વગર માસ્કે રોડ શો યોજ્યો છે. DJનું આયોજન જોતાં જ પોલીસ હરકતમાં આવી હતી અને ચૂંટાયેલા પ્રતિનિધિઓને સમજાવવા પ્રયાસ કર્યો હતો. જોકે હોદ્દા પર આવતાંની સાથે જ આ હોદ્દેદારોએ પોલીસ તંત્રને પણ અવગણી કોરોના ગાઈડલાઈનનું ઉલ્લંઘન કર્યું હતું. પોલીસકર્મી અને અધિકારીઓ ભાજપના શાસકો સામે લાચાર જોવા મળ્યાં હતાં. પોલીસે ડીજે સહિત રોડ શો ન કરવા સમજાવ્યાં તો પણ ખુલ્લેઆમ કોરોના ગાઈડલાઈનના નિયમોનો ભંગ કર્યો હતો.

આ પણ વાંચોઃ મહેસાણામાં જિલ્લા પંચાયતોમાં પ્રમુખ અને ઉપપ્રમુખની વરણી કરાઈ

રોડ શોથી 108 એમ્બ્યૂલન્સનો રસ્તો પણ અવરોધાયો

જિલ્લા પંચાયત આગળથી કોરોના ગાઈડ લાઇન અને પોલીસના સૂચનોને નેવે મૂકી હોદ્દેદારોએ રોડ શો યોજ્યો હતો. જિલ્લા પંચાયત પાસેથી પસાર થતી 108 એમ્બ્યૂલન્સનો માર્ગ પણ તેના લીધે અવરોધાયો હતો. આ સમયેે પોલીસે આ રોડ શો કરનાર જિલ્લા પંચાયત ઉપપ્રમુખની જીપને હટાવવાને બદલે અન્ય વાહનોને હટાવી એમ્બ્યૂલન્સ માટે રસ્તો કાઢી આપ્યો હતો. એટલું જ નહીં, જાહેર રોડ પર ભાજપના નેતાઓ કોરોના ગાઈડલાઈનનું ઉલ્લંઘન કરવા સાથે પોલીસને પણ દબડાવતાં જોવા મળ્યાં હતાં!