કચ્છ ખાતે મુખ્યપ્રધાને અછતના કામો અંગેની સમીક્ષા બેઠક યોજી

કચ્છ: છેલ્લા દોઢ દાયકાની સરખામણીમાં ગત વર્ષે સૌથી ઓછો વરસાદને પગલે અછત અને દુષ્કાળની પરિસ્થિતી છે. કચ્છવાસીઓ માટે પાણી- ઘાસચારા માટે સરકાર પુરી મહેનત કરી રહી છે. આજે કચ્છ આવેલા મુખ્યપ્રધાન વિજયરુપાણીએ કચ્છના લખપત અને અબડાસા તાલુકાના નારાયણ સરોવર અને કોટેશ્વરની મુલાકાત લઈને લોકો સાથે પણ સીધો સંવાદ સાધ્યો હતો. આ ઉપરાંત તંત્ર સાથે બેઠક યોજી કામગીરીનું આંકલન પણ કર્યું હતું.

મુખ્યપ્રધાને નારાયણ સરોવર ખાતે સ્થાનિક પ્રજાજનોએ આશ્વાસિત કર્યા હતા અને જણાવ્યું હતું કે પશુને પણ પીવાના પાણીની કોઇ તકલીફ નહી પડે. આટલા ઓછો વરસાદ હોવા છતાં નખત્રાણા પ્રાંતના આ બન્ને તાલુકાના માત્ર સાત ગામોને જ ટેન્કર વડે પાણી આપવામાં આવી રહ્યું છે.

મુખ્યપ્રધાને કોટેશ્વર મહાદેવના દર્શન કરીને આગામી વર્ષાઋતુ સારી રહે તેવી મંગલકામના કરી હતી. અછતગ્રસ્ત વિસ્તારોને લઇને જણાવ્યું કે, રાજ્ય સરકારે ઓછા વરસાદ થતાની સાથે જ સપ્ટેમ્બર માસમાં જ 96 તાલુકાને અછતગ્રસ્ત જાહેર કરી દીધા હતા. સામાન્ય રીતે ગુજરાતમાં ચોમાસુ 15 જૂનથી બેસી જતું હોય છે. પણ, પાણી અંગેનું આયોજન 31 જુલાઇ સુધીનું છે. એટલે, પીવાના પાણી બાબતે કોઇએ પણ ચિંતા કરવાની જરૂર નથી. ટેન્કર દ્વારા જ્યા પાણી આપવામાં આવે છે, ત્યાં પશુઓ માટે 20 લીટર પાણી વધુ આપવાનો નિર્ણય લેવામાં આવ્યો છે. કચ્છને 2022 સુધી પાણીની સમસ્યામાંથી સંપૂર્ણ મુક્ત કરી દેવાનો અમારો સંકલ્પ છે.મુખ્યપ્રધાન નારાયણ સરોવર ગામમાં લોકોને મળવા પહોંચ્યાં હતા. અને તેમની સાથે ચર્ચા પણ કરી હતી. અબડાસા અને લખપત તાલુકાની અછતની સ્થિતિનું આંકલન કરવા વિજયભાઇ રૂપાણીએ અધિકારીઓ સાથે બેઠક યોજી હતી અને રાજ્ય સરકાર દ્વારા અછતના કામોની સમીક્ષા કરી હતી. અને ત્યાં હાજર અધિકારીઓને સ્પષ્ટ નિર્દેશ આપ્યો હતો કે, પાણી અંગે કોઇ ફરિયાદ આવે તો તેનો તુરંત નિકાલ લઇ આવવો અને ટેન્કરની તમામ માંગણીઓ પૂર્ણ કરવા પણ સુચના આપી હતી.