ગત વર્ષે ઓછા વરસાદને પગલે કચ્છમાં ખેતીની દશા બદલાઈ હતી અને કચ્છમાં સતત વાવેતર વિસ્તાર ઘટી રહ્યો છે. ગત વર્ષ માત્ર પિયત વિસ્તારમાં 2.96 લાખ ખેતરમાં જ વિવિધ પાકોનું વાવેતર થયું હતું. પરંતુ ચાલુ વર્ષ 5.511 લાખ હેક્ટરથી વધુ વાવેતરનો અંદાજ છે. 2012 બાદ કચ્છમાં ચાલુ વર્ષે સૌથી વધુ વાવેતર થયું છે. જેમાં રાપર નખત્રાણા તાલુકામાં સૌથી વધુ વાવેતર થયું છે.
કચ્છમાં ખેતી અને પશુપાલન મુખ્ય વ્યવસાય છે. પરંતુ જે રીતે બે વર્ષથી સૌથી ઓછો વરસાદ કચ્છમાં પડતા ખેતી અને પશુપાલન વ્યવસાય પડી ભાંગ્યો હતો. પશુપાલકો માટે તો સરકારે યોગ્ય વ્યવસ્થા કરી હતી પરંતુ, ખેડૂતો સારા વરસાદની રાહ જોતા હતા તેવામાં ચાલુ વર્ષ સારો વરસાદ પડતા રેકર્ડ વાવેતર કચ્છમાં થયું છે અને સારુ વર્ષ જવાની ખેડૂત અને ખેતીવાડી વિભાગને આશા છે.
છેલ્લા એક સપ્તાહથી મેઘરાજા કચ્છ પર હેત વરસાવી રહ્યા છે. ત્યારે માત્ર આઠ જ દિવસમાં વધુ 1.40 લાખ હેકટરમાં વાવેતર થયું છે. જેને પગલે રાજ્યમાં વાવેતરની દ્રષ્ટિએ કચ્છ ચોથા સ્થાન પર આવી ગયું છે. ગુવાર, દિવેલા, તલ, મગ અને મઠમાં કચ્છ વાવેતરમાં પ્રથમ સ્થાને છે. જ્યારે ઘાસચારાના વાવેતરમાં કચ્છ બીજા નંબર પર છે.
કચ્છમાં બાજરીનું 17100 હેક્ટરમાં, જુવાર11 હેક્ટરમાં, તુવેર100 હેક્ટરમાં, અડદ 300 હેક્ટરમાં, મગફળી 25800 હેક્ટરમાં, તલ 42800 હેક્ટરમાં, દિવેલા 111 800 હેકટરમાં, કપાસ 59100 હેકટરમાં, ગુવાર 61000 હેક્ટરમાં ,શાકભાજી 6300 હેકટરમાં, 1,51800 હેક્ટરમાં ઘાસચારોનું વાવેતર થયું છે.
રાજ્યમાં સુરેન્દ્રનગરમાં 600900માં વાવેતર સાથે પ્રથમ સ્થાને છે. જ્યારે બનાસકાંઠા 594200 હેક્ટર સાથે બીજા નંબરે છે અને 556300 સાથે અમરેલી ત્રીજા સ્થાને છે. જ્યારે કચ્છ 551300 હેક્ટર વાવેતર સાથે ચોથા સ્થાન પર છે.