કચ્છ :ગણેશ ચતુર્થીને હવે માત્ર ગણતરીના દિવસો બાકી રહ્યા છે. ત્યારે ઠેર ઠેર ગણપતિની મૂર્તિઓ બનાવવાનું શરૂ થઈ ચૂક્યું છે. લોકો હાલમાં વિવિધ સામગ્રીમાંથી ઈકો ફ્રેન્ડલી ગણેશજી બનાવવાનું તેમજ ખરીદવાનું વધારે પસંદ કરી રહ્યા છે. જેમાં માટી, ગોબર અને નાળિયેરના રેસામાંથી ગણપતિની અવનવી મૂર્તિઓ બનાવવામાં આવી રહી છે. કચ્છના અંતરજાળ ગામના શ્રી સર્વ જીવ કલ્યાણ ટ્રસ્ટ દ્વારા છેલ્લા 3 વર્ષથી માટીના ઈકો ફ્રેન્ડલી ગણેશજીની મૂર્તિ બનાવવાનું કાર્ય કરવામાં આવી રહ્યું છે.
ઈકો ફ્રેન્ડલી ગણેશ મૂર્તિ : ગણેશ ઉત્સવ 2023 માટે શ્રી સર્વ જીવ કલ્યાણ ટ્રસ્ટ દ્વારા અંતરજાળ મધ્યે ઈકો ફ્રેન્ડલી ગણેશ મૂર્તિ બનાવવાનું શરૂ કરવામાં આવ્યું છે. આસપાસની બહેનો કે જેઓને પણ કંઈ કાર્યમાં વ્યસ્ત રહેવું હોય તેમના સહયોગ માટે તેમજ તેમને પણ આ કાર્યમાં જોડાવા અપીલ કરવામાં આવી છે. ઉપરાંત શ્રી સર્વ જીવ કલ્યાણ ટ્રસ્ટના ટ્રસ્ટી મુકેશ બાપટે ઈકો ફ્રેન્ડલી ગણેશની મૂર્તિને ઘરે લઈ જઈ પૂજન કરી ઘરે જ પાણીમાં વિસર્જન કરવા માટે અપીલ કરી છે.
સર્વ જીવ કલ્યાણ ટ્રસ્ટ :કચ્છના આદિપુર નજીક આવેલા અંતરજાળ ગામમાં શ્રી સર્વ જીવ કલ્યાણ ટ્રસ્ટ આવેલું છે. આ ટ્રસ્ટ દ્વારા દર વર્ષની જેમ આ વર્ષે પણ માટીના ઈકો ફ્રેન્ડલી ગણેશજીની મૂર્તિ બનાવવાનું શરુ કરવામાં આવ્યું છે. આ કાર્ય મનીષા બાપટ, એડવોકેટ રચના જોશી દ્વારા કરવામાં આવે છે. હાલ ઘણા વર્ષોથી વિશ્વનું વાતાવરણ દુષિત થઈ રહ્યું છે. જે ખૂબ ચિંતાનો વિષય છે. વિશ્વમાં ભારત દેશમાં સરકારી તંત્ર દ્વારા પણ પર્યાવરણ બચાવવા વિવિધ અભિયાન હાથ ધરવામાં આવ્યા છે. તો ભારતમાં હાલ વિવિધ સંસ્થાઓ તથા જાગૃત નાગરિકો દ્વારા પર્યાવરણ બચાવવાના અભિયાન પણ મોટા પાયે હાથ ધરવામાં આવી રહ્યા છે.