કચ્છમાં બોર્ડની પરીક્ષામાં 50 કોપી કેસ, CCTV ફુટેજ સામે આવ્યા

કચ્છ જિલ્લામાં ધોરણ 10 અને ધોરણ 12ની બોર્ડ પરીક્ષાઓમાં કોપી કેસ થયાનું સ્પષ્ટ થયું હતુ. શિક્ષણ વિભાગ દ્વારા કરાયેલા CCTV ફુટેજની તપાસમાં આ વિગતો બહાર આવી હતી.

કચ્છઃ જિલ્લમાં લેવાયેલી ધોરણ 10 અને ધોરણ 12ની બોર્ડ પરીક્ષાઓમાં કચ્છમાં 50 વિદ્યાર્થીઓએ કોપી કરી હોવાનું સ્પષ્ટ થયું છે. શિક્ષણ વિભાગ દ્વારા કરાયેલા CCTV ફુટેજની તપાસમાં આ વિગતો બહાર આવી છે.

જિલ્લા શિક્ષણાધિકારી કચેરીમાંથી મળતી વિગતો મુજબ માર્ચ-2020ની ગુજરાત માધ્યમિક શિક્ષણ બોર્ડ દ્વારા SSC, HSC (સા.પ્ર. - વિ.પ્ર.)ની પરીક્ષાઓ લેવામાં આવી હતી. કચ્છ જિલ્લામાં ધોરણ 10 અને ધોરણ 12 મળી કુલ 50 કેન્દ્રો અને 161 પરીક્ષા કેન્દ્રો પર પરીક્ષાઓ લેવામાં આવી હતી.

કચ્છમાં બોર્ડની પરીક્ષામાં 50 કોપી કેસ, CCTV ફુટેજ સામે આવ્યા

આ તમામ પરીક્ષાઓનું CCTV રેકોર્ડિંગ કરવામાં આવ્યુ હતું. શિક્ષણ બોર્ડની ગાઈડલાઈન મુજબ આ પરીક્ષાના અંતે આ તમામ રેકોર્ડિંગનું જિલ્લા શિક્ષણાધિકારી કચેરી દ્વારા નિરીક્ષણ કરવામાં આવ્યું હતું.

કચ્છ શિક્ષણ વિભાગ દ્વારા નિરીક્ષણની પ્રક્રિયા માટે વિવિધ ઝોન બનાવાયા હતા. ભુજ, અંજાર અને નખત્રાણાના કુલ 5 ઝોન મળીને 5 અલગ-અલગ ટીમો દ્વારા આ CCTV ફુટેજ નિરીક્ષણ પ્રક્રિયા હાથ ધરવામાં આવી હતી.

આ પ્રક્રિયા દરમિયાન ધોરણ 10માં વિજ્ઞાન ટેક. વિષયમાં સાત, ગણિત વિષયમાં 13 મળી કુલ 20, જ્યારે ધો. 12 સા.પ્ર. માં અર્થશાત્રમાં ત્રણ, અંગ્રેજી 21, અંગ્રેજી પ્ર. ભાષામાં બે, હિન્દીમાં ચાર મળી કુલ 30 ગેરરીતિના કેસ નોંધાયા હતા.

જિલ્લા શિક્ષણાધિકારી ડૉ. બી. એન. પ્રજાપતિએ જણાવ્યુ હતું કે તમામ કેસ વીડિયો ફૂટેજ સાથે બોર્ડને મોકલી દેવામાં આવ્યા છે.

જોકે કોરોનાની સ્થિતીમાં કોઈપણ વિદ્યાર્થીઓને જિલ્લા કક્ષાએ સુનાવણી માટે બોલાવાયા નથી. આગામી દિવસોમાં આ કોપી કેસ અંગે બોર્ડ કક્ષાએથી નિર્ણય લેવાશે.