ગિરનારની પર્વતમાળાઓ ચોમાસા દરમિયાન વિશ્વની સૌથી સુંદર પર્વતમાળાઓ બની જાતી હોય છે. ચોમાસા દરમિયાન સમગ્ર પર્વતમાળા લીલીછમ વનરાઈઓથી શોભી ઊઠે છે. તેમજ આ પર્વતમાળાઓમાંથી પાણીનો સતત અને અવિરત વહેતો પ્રવાહ અહીં આવતા પ્રવાસીઓને આકર્ષી કરે છે. જટાશંકર મહાદેવની બિલકુલ નજીકમાં આવેલા જટાશંકર ધોધ પ્રવાસીઓ માટે આકર્ષણનું કેન્દ્ર બને છે.
ગિરનાર પર્વત માથી વહી રહેલો પાણીનો પ્રવાહ જટાશંકર નજદીક આવીને ધોધના રૂપમાં પરિવર્તિત થાય છે. આ ધોધ જૂનાગઢ આવતા હરકોઈ પ્રવાસીઓને તેની તરફ ખેંચી રહ્યો છે. કુદરત દ્વારા જે પ્રકારે ધોધનુ સર્જન કરવામાં આવ્યું છે. તેમાં પ્રવાસીઓ ખૂબ જ મન મૂકીને કુદરતના આ સર્જનને જાણે કે માણવા માટે થનગનતા હોય તેવું જોવા મળ્યું હતું.
જૂનાગઢવાસીઓ ચોમાસાની બેશબરીથી રાહ જોતા હોય છે જેનું એકમાત્ર કારણ જટાશંકરનો ધોધ છે. પર્વત માળાઓ માંથી સતત વહેતા પાણીના પ્રવાહ નીચે પ્રવાસીઓ મનમૂકીને નાહવાની સાથે પવિત્ર શ્રાવણ માસમાં ભગવાન ભોળાનાથ સમક્ષ હાજર થતા હોય છે. જટા શંકર ધોધનું કુદરતી સૌંદર્ય એટલું રમણીય હોય છે કે, અહીં સૌ કોઈ પોતાની જાતને ધોધના પ્રવાહ નીચે જાતા અટકાવી શકતું નથી.
હાલ પવિત્ર શ્રાવણ માસ ચાલી રહ્યો છે. જેને લઇને જટાશંકર તરફ માનવ મહેરામણમાં સતત ઘટી રહ્યું છે. એક મહિના સુધી જટાશંકર મહાદેવના દર્શન કરવા માટે ભાવિકો ખુબ મોટી સંખ્યામાં અહીં આવતા હોય છે. અંદાજિત બે કિલોમીટર જેટલી પગપાળા અને દુર્ગમ જંગલ વિસ્તારમાંથી પસાર થઈને આ ધોધ સુધી પહોંચી શકાય છે. કુદરતના આર બેનમૂન સર્જનને માણવા અને તેમાં ડૂબકી લગાવવા માટે અહીં આવતા પ્રવાસીઓ જંગલના રસ્તા પર પણ પગપાળા પ્રવાસ કરીને અહીં આવે છે. ભોળાનાથના દર્શન કરી અને જાતને ધન્ય કરે છે. તો બીજી તરફ જટાશંકર ધોધમાં પ્રવાહિત થતાં જળથી પોતાના શરીરને પણ શુદ્ધ કરીને શ્રાવણ મહિનાની ઉજવણી કરે છે.