જામનગરના કાલાવડ પંથકમાં વરસાદ ખાબક્યો, ધરતીપુત્રો ચિંતાતુર

જામનગરના કાલાવડ પંથકમાં રવિવારે સાંજે ખાબકેલા કમોસમી વરસાદના કારણે ખેડૂતોએ વાવેલા પાકને નુક્સાન પહોંચતા ખેડૂતોને રાતાપાણીએ રોવાનો વારો આવ્યો છે.

• ચૈત્ર મહિનામાં અષાઢ મહિના જેવો વરસાદ
• કાલાવડ પંથકમાં કરા સાથે વરસાદ પડ્યો
• કોરોના વચ્ચે વધુ એક નુક્સાનથી ખેડૂતો ચિંતામાં

જામનગર: એક તરફ સમગ્ર રાજ્ય કોરોના સામે લડી રહ્યું છે. એવામાં જામનગરના કાલાવડ પંથકમાં પડેલા કમોસમી વરસાદના પગલે ખેડૂતોના ઉભા પાકને ઘણુ નુક્સાન પહોંચ્યું છે. ખેડૂતોએ વાવેલા તલ, મગ, અળદ, ડુંગળી, લસણ વગેરેના પાકને નુક્સાન પહોંચતા ખેડૂતોમાં નિરાશા વ્યાપી ગઈ છે.

જામનગરના વાતાવરણમાં આવ્યો એકાએક પલટો

રવિવારે બપોર બાદ જામનગરના વાતાવરણમાં પલટો આવ્યો હતો. અસહ્ય ગરમી વચ્ચે એકાએક વાદળછાયું વાતાવરણ થઈ જતા બફારો થવા લાગ્યો હતો. ઉલ્લેખનીય છે કે, તાજેતરમાં જ જામનગરના મોટી ગોપમાં પણ આ જ પ્રકારે કમોસમી વરસાદે ખેડૂતોની ચિંતા વધારી હતી.