જામનગર કોંગ્રેસના નગરસેવિકાએ અસ્ટેટ શાખામાં જઈને ધમાલ મચાવી

જામનગર: શહેરમાં ફરી એકવાર નગરસેવિકા દ્વારા અસ્ટેટ શાખા ખાતે ધમાલ મચાવવામાં આવી હતી. જેમાં ગુરૂવારે બપોરના સમયે જાહેરાતના હોર્ડિંગ બાબતે અસ્ટેટ શાખામાં અરજદાર રજૂઆત કરવા પહોંચ્યા હતા. ત્યારે અરજદારને યોગ્ય જવાબ ન આપતા તેમણે જેનબબેન ખફીને જાણ કરી હતી. આ બાબતે અસ્ટેટ શાખા ખાતે પહોંચીને જેનબબેન ખફીએ ધમાલ મચાવી હતી.

શહેરમાં જાહેરાતના હોર્ડિંગ બાબતે અસ્ટેટ શાખા ખાતે અરજદાર રજૂઆત કરવા માટે આવ્યા હતા. તે દરમિયાન તેમને અસ્ટેટ શાખાના અધિકારીઓ પાસેથી જવાબ મળ્યા ન હતો. જેને લઈને અરજદારોએ જેનબબેન ખફીને જાણ કરી હતી. આ જાણ મળતા જેનબબેન ખફી અસ્ટેટ શાખા ખાતે પહોંચ્યા હતા. તે સમય દરમિયાન આ મામલો વધુ બિચક્યો હતો અને સામાન્ય બોલાચાલી બાદ નગરસેવિકાએ એસ્ટેટ શાખામાં ધમાલ મચાવી હતી અને ઓફિસમાં ફાઈલો ફેંકી દીધી હતી.

જામનગરમાં આવેલા વોર્ડ નંબર-12ના નગરસેવિકા જેનબબેન ખફીએ અસ્ટેટ શાખામાં ધમાલ મચાવી હતી. આ અગાઉ શાસકપક્ષના નગરસેવિકા રચનાબેન અદાણીએ પણ સોલિડ વેસ્ટ શાખામાં ધમાલ મચાવી હતી.

છેલ્લા એક મહિનામાં જામનગરની બે નગરસેવિકાઓએ મહાનગરપાલિકામાં ધમાલ મચાવી છે. મહાનગરપાલિકાના અધિકારીઓ અને કર્મચારીઓ ગરીબ માણસોનું કામ ન કરતા હોવાનો અનેક વખત આક્ષેપો પણ થયા છે. ત્યારે પ્રશ્ન એ થઈ રહ્યો છે કે, શા માટે નગરસેવિકાને મહાનગરપાલિકાની ઓફિસોમાં ધમાલ કરવી પડે છે. ત્યારે જામનગર મહાનગરપાલિકાના અધિકારીઓ પ્રજાના કામ કરવામાં પાછા પડે છે કે કામચોરી કરી રહ્યાં છે.