વી. એસ. હોસ્પિટલનો મુદ્દો વિધાનસભામાં, સરકારે હાથ ઊંચા કરી કહ્યું કોર્પોરેશનમાં રજૂઆત કરો

ગાંધીનગરઃ આજે વિધાનસભા ગૃહમાં અમદાવાદના ધારાસભ્ય ગ્યાસુદીન શેખે સરકાર સમક્ષ ગંભીર સવાલો ઉભા કર્યા હતા. તેમણે જૂની વીએસ હોસ્પિટલને બંધ થઈ જવા મુદ્દે સરકારને આડે હાથ લીધી હતી. જેમાં નાયબ મુખ્યપ્રધાને તેનો જવાબ આપતાં વીએસ હોસ્પિટલમાં સરકારની કોઈ ભૂમિકા ન હોવાનું જણાવ્યું હતુ.

વિધાનસભા સત્રમાં કોંગ્રેસના ધારાસભ્યોએ રાજ્યની આરોગ્ય વ્યવસ્થા મજબૂત કરવા માટે સૂચનો આપ્યા હતા. અમદાવાદના કોંગ્રેસી ધારાસભ્ય ગ્યાસુદ્દીન શેખે સરકાર પર આકરા પ્રહાર કર્યા હતા. તેમણે સરકારને આડે હાથ લેતા કહ્યું કે, વીએસ હોસ્પિટલ કેમ્પસમાં 1500 બેડની નવી સરદાર હોસ્પિટલ ઉભી કરી દેવામાં આવી છે. જે સારી વાત છે, પરંતુ સરકાર પાછલા બારણે અમદાવાદની જૂની ઓળખ અને ગરીબ તેમજ મધ્યમવર્ગને પરવળે તેવી જૂની હોસ્પિટલ બંધ કરવાના પ્રયત્નો કરી રહી છે. હાલ જૂની વીએસ હોસ્પિટલમાંથી સારવારની તમામ સુવિધાઓ દૂર કરીને માત્ર ઓપીડી જ ચાલુ રાથી છે. જેથી દર્દીઓને પારાવાર મુશ્કેલી પડી રહી છે.

બીજીતરફ નાયબ મુખ્યપ્રધાન નિતિન પટેલ આ બાબતે જવાબ આપતા કહ્યું હતુ કે, સરકાર કોઈ પણ હોસ્પિટલને બંધ કરવા માંગતી નથી. વીએસ હોસ્પિટલ એ રાજ્ય સરકાર સંચાલિત નથી. પરંતુ કોર્પોરેશન સંચાલિત છે. જેથી કોંગ્રેસના સભ્યોએ આ બાબતે મેયરને રજૂઆત કરવી જોઈએ. રાજ્ય સરકારનો વીએસ હોસ્પિટલમાં કોઈ રોલ નથી. માત્ર 100 કરોડની ગ્રાન્ટ ફાળવી આપે છે. જેથી કોંગ્રેસ અમદાવાદના મેયરને રજૂઆત કરે.