ડાંગમાં માતા-પિતાની છત્રછાયા ગુમાવનાર બાળકો માટે આધારરૂપ બની પાલક માતા-પિતા યોજના

ડાંગઃ જે બાળકો પાસે જીવન જીવવા માટે કોઈ આધાર નથી. તેવાં બાળકોના હિત માટે સરકાર દ્વારા પાલક માતા-પિતા યોજના અમલમાં મૂકવામાં આવી છે. આ યોજના અંતર્ગત પાલક પિતાને સરકાર દ્વારા આર્થિક સહાય આપવામાં આવે છે. જેથી તે બાળકની જવાબદારી ઉઠાવવાની સાથે તેના ભવિષ્યને પણ સુરક્ષિત કરી શકે. આ યોજનાનું ઉત્તમ ઉદાહરણ ડાંગ જિલ્લામાં જોવા મળે છે.

આહવામાં આવેલાં આબાંપાડા વિસ્તારમાં રહેતી 8 વર્ષીય સારિકાના માતા -પિતાનું માંદગીમાં મૃત્યુ થયું. નાનકડી સારિકાનો એકમાત્ર આધાર છીનવાઈ ગયો, ત્યારે સારિકાના મામા સુરેશભાઈ માહલે તેની જવાબદારી ઉપાડી.પણ તેની આર્થિક જવાબદારી ઉઠાવવામાં તેમને કટોકટીનો સામનો કરવો પડતો હતો. તે માંડ મજૂરી કરીને ગુજરાન ચલાવતા હતા. તેવામાં સારિકાની જવાબદારી ઉઠાવવામાં ઘણી મુશ્કેલી થતી હતી. તે દરમિયાન સુરેશભાઈને સરકારની પાલક માતા-પિતા યોજનાની જાણ થઈ અને તેમણે આ યોજનાનો લાભ લઈ સારિકાના જીવનને સુરક્ષિત કરવાનો નિર્ણય કર્યો.

સારિકાના મામા સુરેશને ડાંગમાં જિલ્લા બાળ સુરક્ષા એકમ, ડાંગ-આહવાની કચેરીમાં સંપર્ક કર્યો અને સંબધિત કચેરીમાંથી પાલક માતા-પિતા યોજનાની સંપૂર્ણ જાણકારી મેળવી. પાલક પિતાનું અરજીપત્રક સાથે જરૂરી પુરાવા રજૂ કર્યા. સારિકાના માતા-પિતાનો મરણનો દાખલો, ચૂંટણી કાર્ડ, આવકનો દાખલો અને તલાટી-કમ મંત્રીના દાખલા સહિતના દસ્તાવેજો રજૂ કર્યા.

આ યોજના અંતર્ગત બાળકને 18 વર્ષ સુધી અથવા અભ્યાસ કરે ત્યાં સુધી દર માસે રૂા.3000/-ની સહાય કરવામાં આવે છે. જે D B T ધ્વારા સીધી તેના બેન્ક ખાતામાં જમા થાય છે. યોજનાનો મુખ્ય ઉદ્દેશ પાલક માતા કે પિતા પર પોતાના બાળકોના ઉછેર સાથે બાળકનો વધુ બોજો ન આવે. સાથે બાળકની પ્રાથમિક જરૂરીયાતોને પૂરી કરવાનો છે.

આમ, આ યોજના દ્વારા સારિકાના પાલક પિતા સુરેશભાઇ માહલે પિતા તરીકેનો પ્રેમ અને હુંફ આપવાની સાથે તેની જરૂરિયાત અને ભવિષ્યને પણ સુરક્ષિત કર્યુ.