સંઘપ્રદેશ દમણના માર્ગો પર રખડતા ઢોરનો ત્રાસ

દમણમાં રખડતા પશુઓના કારણે લોકો ત્રાહિમામ પોકારી ગયા છે. માર્ગની નજીકમાં જ અડીંગો જમાવીને ઉભા રહેતા કે બેસી રહેતા ઢોરને કારણે અવારનવાર અકસ્માત સર્જાતા હોય છે. જેને કારણે વાહન ચાલકો તથા રાહદારીઓને અસ્થિભંગ સુધીની ઇજાઓ પહોંચે છે.

દમણઃ હાલ ચોમાસાની સીઝનમાં દમણના કોસ્ટલ હાઇવે, વરકુંડ રોડ, કોલેજ રોડ, બામણપુંજા અને ઢોલરના માર્ગો પર રખડતા ઢોરોએ પોતાનો અડિંગો જમાવ્યો છે, એક તો વરસાદી સીઝન, ઉપરથી બંધ સ્ટ્રીટ લાઈટો, આવા જોખમી માહોલ વચ્ચે અંધારિયા માર્ગો પર બેસેલા ઢોરને કારણે અનેક વાહન ચાલકો અને રાહદારીઓનું જીવન જોખમમાં મુકાઈ રહ્યું છે, ચોમાસામાં દૂધ મલાઈ ખાઈને ઢોરને જાહેર માર્ગો પર છોડી મુકતા ઢોર માલિકો વિરૃદ્ધ પ્રશાસન કોઈ કડક પગલાં પણ લેતું નથી.

ઉપરાંત રસ્તા પર નાની લારી અને ગલ્લા લઇને વેપાર કરતા વેપારીઓએ પણ ક્યારેક આ રખડતા ઢોરના ત્રાસનો ભોગ બનવું પડે છે. તંત્ર દ્વારા ક્યાંકને કયાંક રખડતા ઢોરને પકડવામાં પણ બેદરકારી દાખવવામાં આવી રહી છે. જેનો ભોગ દમણની જનતા બની રહી છે. દમણ બસ સ્ટેશન, સોસાયટી વિસ્તાર અને જ્યાં એંઠવાડ ફેંકાય ત્યાં મોટી સંખ્યામાં ઢોર ધસી જાય છે.

સંઘપ્રદેશ દમણના માર્ગો પર રખડતા ઢોરનો ત્રાસ

દમણ બજાર વિસ્તારમાં લારી ગલ્લાવાળાઓ, શાકભાજીવાળાઓ જે ગમે ત્યાં વેસ્ટેજ ફેંકે છે. ત્યાં આગળ આખલાઓ અને ગાયોના ઝુંડ ભેગા થઇ જાય છે. વહીવટી તંત્ર આ અખલાઓને પાંજરે પુરવાની વ્યવસ્થા કરવામાં ઉણું ઉતર્યું છે. આખલાઓ દમણના જાહેર માર્ગો પર ગમે ત્યાં રખડતા ભટકતા તોફાને ચડે છે અને લોકોને મુશ્કેલીમાં મુકી રહ્યા છે. વાહનોને નુકસાન પહોંચાડી રહ્યા છે.

સંઘપ્રદેશ દમણના માર્ગો પર રખડતા ઢોરનો ત્રાસ

ત્યારે પ્રશાસન અને સ્થાનિક વહીવટી તંત્રએ રખડતા ઢોર પર કાબુ મેળવવા અસરકારક પગલાં લે તેવી લોકમાંગ હાલ બળવત્તર બની રહી છે.