દમણના કાર્યકરને પ્રદેશ અધ્યક્ષ બનાવતા સેલવાસમાં ભાજપના કાર્યકરોએ નોંધાવ્યો વિરોધ

દમણ: સેલવાસ કેન્દ્રશાસિત પ્રદેશ દાદરા નગર હવેલી દમણ અને દીવના પ્રદેશ અધ્યક્ષ તરીકે દમણના દીપેશ ટંડેલની વરણી કરવામાં આવતા દાદરા નગર હવેલી ભાજપના કાર્યકરોમાં વિરોધનો સૂર ઉઠ્યો છે. અધ્યક્ષ તરીકે નામની જાહેરાત કરનાર સંદીપ પાત્રા સામે દાદરા નગર હવેલીના ભાજપના પૂર્વ સાંસદ નટુભાઇના સમર્થકોએ હોબાળો મચાવ્યો હતો.

એક કેન્દ્રશાસિત પ્રદેશ બન્યા બાદ દાદરા નગર હવેલી વિસ્તાર અને વસ્તીની દ્રષ્ટિએ પણ મોટો વિસ્તાર હોવા છતાં દમણના કાર્યકરને અધ્યક્ષ બનાવ્યા છે. જે આ આદિવાસી વિસ્તારને અન્યાય કર્યો ગણાય છે. સાંસદ પણ દમણના અને અધ્યક્ષ પણ દમણના તો દાદરા નગર હવેલીના નિષ્ઠાવાન કાર્યકરોનું શું? તેવા સવાલો ઉઠાવ્યા હતાં. તેમજ સમર્થકોએ સંદીપ પાત્રા સામે જ નારા લગાવી આક્રોશ વ્યક્ત કર્યો હતો.

સમર્થકોએ મચાવેલ હોબાળા દરમિયાન નટુભાઈએ તમામ કાર્યકરોને શાંતિ જાળવવા અને કાર્યાલય છોડી બહાર જવા અનુરોધ કર્યો હતો. જો કે, તેમ છતાં ભાજપ કાર્યાલય ખાતે જ દાદરા નગર હવેલીના નટુભાઇએ સમર્થકોમાં વ્યાપેલો આક્રોશ અને નારાજગી છતી થઈ હતી. જે આગામી દિવસોમાં વિરોધના સૂર તરીકે ફૂટી નીકળશે. તેવા એંધાણ આપ્યા હતાં.