દાહોદમાં ગેરકાયદેસર રાસાયણિક ખાતર વેચાણની દુકાન પર રેડ, 195 થેલીનો જથ્થો જપ્ત કરાયો

દાહોદ જિલ્લમાં ખેડૂતો સાથે છેેતરપિંડી કરી અમુક વેપારીઓ દ્વારા હલકી ગુણવત્તાના રાસાયણિક ખાતરનું વેચાણ કરવામાં આવી રહ્યું હતું. જેથી ખેતીવાડી વિભાગ દ્વારા તપાસ શરૂ કરી ગેરકાયદેસર વેચાણની 195 થેલી રાસાયણિક ખાતર ઝડપી પાડી કાયદેસરની કાર્યવાહી હાથ ધરી હતી.

દાહોદઃ જિલ્લામાં ચોમાસુ પાકના વાવેતર સાથે હલકી ગુણવત્તાના રાસાયણિક ખાતરનું વેચાણ કરવામાં આવી રહ્યુ હોવાની બૂમો ઉઠવા લાગી હતી. જેથી ખેતીવાડી વિભાગ દ્વારા તપાસ શરૂ કરવામાં આવી હતી. ખેતીવાડી વિભાગ દ્વારા આકસ્મિક દરોડા દરમિયાન ગરબાડામાંથી ગેરકાયદેસર વેચાણની 195 રાસાયણિક ખાતરની થેલી ઝડપી પાડી કાયદેસરની કાર્યવાહી હાથ ધરી હતી.

વર્ષાઋતુના આગમન પહેલા અને પછી જિલ્લાના ધરતીપુત્રો દ્વારા સર્ટિફાઇડ બિયારણ તેમજ રાસાયણિક ખાતરની ખરીદી એગ્રો સેન્ટર પરથી કરવા માટે ખેડૂતોની લાઈનો લાગતી હોય છે. ટૂંકા ગાળામાં ખરીફ પાકનું વાવેતર કરવાનું હોવાના કારણે આ સમય દરમિયાન કમાઇ લેવાની લાલચમાં કેટલાક વેપારીઓ દ્વારા ગેરકાયદેસર રીતે નકલી સીડ્સ અને હલકી ગુણવત્તાનું યુરિયા ખાતરનો જથ્થો પણ વેચવામાં આવતો હોવાની માર્કેટમાં બૂમ ઉઠવા લાગી હતી.

જેથી જિલ્લા કલેક્ટર વિજય ખરાડીએ કૃષિ વિભાગને લાયસન્સ વિનાના અને હલકી ગુણવત્તાના ખાતર વેચતા વેપારીઓ સામે કડકમાં કડક પગલા લેવા સપષ્ટ સૂચના આપવામાં આવી છે. ત્યારે જિલ્લા ખેતીવાડી વિભાગ દ્વારા દાહોદ જિલ્લાના ગરબાડામાં રિલાયન્સ પેટ્રોલ પંપની સામે દલસિંગભાઇ રાઠોડની દુકાનમાં આકસ્મિક ચેકિંગ હાથ ધરવામાં આવ્યું હતું.

આ ચેકિંગ દરમિયાન દુકાનમાંથી 195 બેગનો દોઢ લાખથી પણ વધુનો રાસાયણિક ખાતરનો જથ્થો જપ્ત કરવામાં આવ્યો હતો. ગરબાડાના ખેતીવાડી અધિકારી પી.કે.ભાભોરે આ કાર્યવાહી હાથ ધરી હતી. આ રાસાયણિક ખાતરમાં ઓર્ગેનિક મેન્યુર અને સોઇલ કન્ડીશનલની રૂપિયા 1,55,875ની કિંમતની કુલ 195 બેગ જપ્ત કરવામાં આવી હતી.

દલસિંગભાઇ પર રાસાયણિક ખાતર નિયંત્રણ હુકમ 198ના ખંડ 7ના ભંગ બદલ કાયદેસરની કાર્યવાહી હાથ ધરવામાં આવી છે. ત્યારે જે કંપનીઓ ઉંચા ભાવે ખેડૂતોને હલકી ગુણવત્તાના ખાતર વેચી રહ્યા છે તેમના પર પણ કાર્યવાહી કરવામાં આવી રહી છે.

ખેડૂતોએ આ બાબતે ખૂબ સાવચેત રહી ફક્ત લાયસન્સ ધરાવતા વેપારીઓ પાસેથી જ ખાતર ખરીદવા જણાવવામાં આવ્યું છે. જિલ્લાના નાયબ ખેતી નિયામક (વિસ્તરણ)એ જણાવ્યું છે કે, ખેડૂતો કુદરતી ખેતીની પદ્ધતિ અપનાવી રાસાયણિક ખાતરનો ઉપયોગ ટાળી શકે છે અને બમણું ઉત્પાદન પણ મેળવી શકે છે. આ પદ્ધતિ પ્રમાણે ખાતર, દવા, બિયારણ ખરીદવાની જરૂરીયાત રહેતી નથી. ગાય આધારિત દેસી જીવામૃત અને દેશી વનસ્પતિઓ ભગડો, દિવેલ, કરંજ જેવા પાનના ઉકાળામાંથી કુદરતી જંતુનાશક દવાવો ઘરે જ બનાવી ખેડૂતો ઉપયોગ કરી શકે છે.