આ યોજનાનો લાભ લઈને દાહોદ જિલ્લાના લીમડી ગામના દક્ષાબેન ચૌહાણ મહિલાઓ માટે પ્રેરણારૂપ કામગીરી કરી રહ્યા છે. ફક્ત સાતમું ધોરણ ભણેલા દક્ષાબેન મહિને 40 હજારથી પણ વધુની આવક મેળવી રહ્યા છે. અત્યારના સમયમાં દરેક વ્યક્તિ પોતાનું જીવનધોરણ ઉચું લઇ જવા મથી રહ્યો છે, ત્યારે પોતાની આવક વધારી કુંટુંબીજનો માટે શિક્ષણ, આરોગ્ય વગેરે ઉચ્ચકક્ષાના મળે તે માટેના પ્રયાસો કરી રહ્યાં છે.
દક્ષાબેન પોતાના પતિની મદદથી કરિયાણાનો વેપાર કરતા હતા. પરંતુ, મહિને 12 હજાર જેટલી આવક પણ મુશ્કેલીથી થતી હતી. તેમના ત્રણ બાળકો પ્રાથમિક-માધ્યમિક શિક્ષણ મેળવી રહ્યા હતા. વધતી જતી આર્થિક જરૂરીયાતોને કારણે દક્ષાબેન અને તેમના પતિ દિનેશભાઇ આવક વધારવા માટે વેપારને વિસ્તારવા માંગતા હતા. છૂટક વેપારની સાથે હોલસેલ વેપાર પણ શરૂ કરવાનો ઇરાદો હતો. પરંતુ એટલું મૂડીરોકાણ લાવવું કઇ રીતે એ પ્રશ્ન હતો. દિનેશભાઇ ખાનગી લોન લેવાનું પણ વિચાર્યુ હતુ. નાણા વ્યાજે મેળવવાનો પણ એક વિકલ્પ હતો. પણ તેઓ વ્યાજના ખપ્પરને સારી રીતે ઓળખતા હતા. તેનું ઉંચુ વ્યાજ અને હપ્તાને પહોંચી નહી વળાય એમ વિચારીને ખાનગી લોન લેવાનું ટાળ્યુ હતું.