વલસાડ જિલ્લામાં મંગળવારે વહેલી સવારથી મોડી સાંજ સુધી વાતાવરણમાં પલ્ટો જોવા મળ્યો હતો. વાદળછાયા વાતાવરણ વચ્ચે આકાશમાં મોડી સાંજે સૂર્યદેવના રંગબેરંગી કિરણોએ અનોખી આભા ઉભી કરી હતી. વલસાડ જિલ્લાની વાત કરીએ તો વલસાડ જિલ્લામાં મંગળવારે 34 ડીગ્રી મહત્તમ તાપમાન સાથે રાજ્યનું સૌથી ગરમ મથક બન્યું હતું. જ્યારે લઘુતમ તાપમાન 19 ડીગ્રી રહ્યું હતું. જિલ્લામાં ભેજનું પ્રમાણ 74 ટકા નોંધાયું હતું.
વાપી અને સંઘપ્રદેશમાં વાતાવરણમાં પલ્ટો આ તરફ જિલ્લાના વાપી ઔદ્યોગિક વસાહતમાં પણ વાતાવરણ પલટયું હતું. વાપીમાં મહત્તમ તાપમાનનો પારો 33 ડીગ્રી રહ્યો હતો. લઘુત્તમ તાપમાન 22 ડીગ્રી રહ્યું હતું. 10 કિમીની ઝડપે ફૂંકાતા પવનને પ્રતાપે વાતાવરણમાં 64 ટકા ભેજનું પ્રમાણ વર્તાયુ હતું. સાંજના સમયે લોકો ઠંડકનો એહસાસ કરતા જોવા મળ્યાં હતાં. વાહનો પર જતાં આવતા વાહનચાલકો, રાહદારીઓ ઠંડકભર્યા વાતાવરણનો આનંદ માણતા માર્ગો પર પસાર થઈ રહ્યા હતાં.જ્યારે સંઘપ્રદેશ દામણની વાત કરીએ તો દમણમાં મહત્તમ તાપમાન 32 ડીગ્રી અને લઘુત્તમ તાપમાન 23 ડીગ્રી રહ્યું હતું. દરિયા કિનારાને કારણે દમણમાં હવાનું જોર 13 KM પ્રતિ કલાકે રહ્યું હતું. વાતાવરણમાં ભેજનું પ્રમાણ 62 ટકા નોંધાયું હતું. સંઘપ્રદેશ દાદરા નગર હવેલી મંગળવારે સૌથી વધુ ગરમ પ્રદેશ રહ્યો હતો. અહીં 35 ડીગ્રી મહત્તમ તાપમાન સાથે 21 ડીગ્રી લઘુત્તમ તાપમાન નોંધાયું હતું.
રાજ્યમાં સૌથી નીચું તાપમાન ગાંધીનગરમાં 15 ડીગ્રી રહ્યું હતું. દક્ષિણ ગુજરાતમાં વલસાડ ઉપરાંત સુરતમાં લઘુત્તમ તાપમાનનો પારો 20 ડીગ્રી અને મહત્તમ તાપમાનનો પારો 33 ડીગ્રી પર હતો. ગુજરાતના અન્ય મુખ્ય શહેરોમાં પણ લઘુતમ તાપમાન 17 ડિગ્રીથી 24 ડીગ્રી વચ્ચે રહ્યું હતું. જ્યારે મહત્તમ તાપમાન 30 થી 33 ડીગ્રી વચ્ચે રહ્યું હતું. હાલમાં હવામાન વિભાગની આગાહી મુજબ હજુ પણ આગામી 5 દિવસ સુધી વાતાવરણમાં ઠંડીનું પ્રમાણ નહિવત હોવાનું જણાવ્યું છે.
