પોરબંદરમાં વોકિંગ ઝોનનું જાહેરનામું હટાવવા વેપારીઓએ ધરણા યોજ્યા

પોરબંદરઃ શહેરના ડ્રીમલેન્ડ સિનેમાથી માણેક ચોક સુધીના રસ્તાને ગત 10 જુનથી વાહનો માટે પ્રવેશબંધી ફરમાવી અને માત્ર વોકિંગ ઝોન જાહેર કરાયો છે. જેના કારણે ગ્રાહકોનું પ્રમાણ ઘટ્યું છે. આ કારણોસર વેપારીઓમાં રોષ ભભૂક્યો હતો.

આ અંગે છેલ્લા ઘણા સમયથી વેપારીઓએ ઘણી વખત રજૂઆત કરવા છતાં કોઈ નિર્ણય ન લેવામાં આવતા સોમવારે તમામ વેપારીઓએ દુકાનો બંધ રાખી માણેક ચોકમાં ગાંધીજીની પ્રતિમા પાસે ધરણા કર્યા હતા.

પોરબંદરમાં આવેલા ડ્રીમલેન્ડ સિનેમાથી માણેક ચોક સુધીના આ માર્ગ પર પુષ્કળ પ્રમાણમાં વેપાર ધંધાને લગતી, જીવન જરૂરિયાતની વસ્તુઓના વેપારીઓની દુકાનો આવેલી છે. જ્યાં સવારથી સાંજ સુધી લોકો ખરીદી કરવા માટે આવતા હોય છે. આ માર્ગ વન-વે હતો અને પાર્કિંગ માટે નિયમ મુજબ બન્ને સાઈડ પાર્કિંગ કરવામાં આવતું હતું.

પરંતુ અચાનક વહીવટી તંત્ર દ્વારા આ રોડને વોકિંગ ઝોન તરીકે જાહેર કરતું જાહેરનામું બહાર પાડવામાં આવ્યું હતું. જેનો સતત વિરોધ હોવા છતાં તેને અમલ કરવામા આવ્યું હતું. આ જાહેરનામાંની અમલવારી પછી વેપારીઓને વ્યવસાયમાં 80 ટકા જેટલો માર પડ્યો છે, અને માત્ર 20 ટકા ઘરાકી રહી છે જેથી વેપારીઓને મોટો આર્થીક ફટકો પડી રહ્યો છે.

આ રોડનું વોકિંગ ઝોનનું જાહેરનામું રદ કરવામાં આવે અને વન-વે હતો તે રાબેતા મુજબ કરી આપવામાં આવે તેમ વેપારીઓ અને કોંગ્રેસના આગેવાનોએ જણાવ્યુ હતું.