કલોલ તાલુકાના છત્રાલમાં આવેલી એક્સિસ બેંકમાં શનિવારે બપોરે એક વાગ્યે ત્રણ લૂંટારૂઓ હાથમાં દેશી હથિયાર લઇને બેંકમાં પ્રવેશ્યા હતા. ગાર્ડ વિનાની એક્સિસ બેંકમાં પ્રવેશીને ત્રણેય લૂંટારુઓ સિધાજ કેશીયર પાસે પહોંચી ગયા હતા, કેશીયર પાસે રહેલી 43.88 લાખ રોકડ નાણાં થેલામાં ભરી દીધા હતા. કર્મચારીએ પહેરેલા એક તોલાના સોનાના ચેઇનની પણ લૂંટ કરી ફરાર થઈ ગયા હતા. લૂંટારુઓ દ્વારા બેંકમાં ફાયરિંગ પણ કરવામાં આવ્યું હતું. જેમાં કેશિયરના પગમાં ગોળી વાગતા તે ઈજાગ્રસ્ત થયો હતો, જેને સારા અર્થે હોસ્પિટલ લઈ જવાયો હતો.
બેંકમાં લૂંટને લઈને રેન્જ આઇજી મયંકસિંહ ચાવડાએ કહ્યું કે, ત્રણ લૂંટારૂઓ બપોરે 1:18 મિનિટે બેંકમાં પ્રવેશ કર્યો હતો. આ લોકોના હાથમાં એકના હાથમાં દેશી તમંચો હતો અને બીજાના હાથમાં દાતરડું હતું. એક ની પાસે કાળા કલરનો થેલો હતો બેંકમાં ગાર્ડ રાખવામાં આવ્યો નહતો. જેની માહિતી તેમની પાસે હોવાની શક્યતા જોવા મળી રહી છે. તેને લઈને જ લૂંટારુઓ દ્વારા લૂંટને અંજામ આપવામાં આવ્યો હતો. આ બનાવને લઇને મહેસાણા અને કડી પોલીસને સાબદી કરી દેવામાં આવી છે.
બેંકના સીસીટીવી ફૂટેજના આધારે તપાસ કરવામાં આવી રહી છે. આ બનાવની ફરિયાદ તાલુકા પોલીસ સ્ટેશનમાં નોંધાતા પોલીસે આગળની કાર્યવાહી હાથ ધરી છે. ઉલ્લેખનીય છે કે ગાંધીનગર જિલ્લાની પોલીસને માથું ખંજવાળતી કરી દેવામાં આવી છે, પોલીસનો પનો ટૂંકો પડી રહ્યો છે, ત્યારે વધુ એક ચેલેન્જ પોલીસ સામે આવીને ઊભી થઈ છે. જોવાનું એ રહે છે કે જે પોલીસ સીરીયલ કિલરને પકડી શકી નથી તે લૂંટારૂઓને કેવી રીતે પકડશે.
