કોંગ્રેસના 18 ધારાસભ્યોના ગઢડાના ફાર્મ હાઉસમાં ધામા, અનેક તર્ક વિતર્ક શરૂ

ગઢડાની કોંગ્રેસ બેઠક પરથી ચૂંટાયેલા ધારાસભ્ય પ્રવીણ મારૂએ કોંગ્રેસમાંથી રાજીનામું આપ્યા બાદ ગુરુવારે બોટાદના ગઢડામાં એક સાથે 18 ધારાસભ્યોએ ધામાં નાખતાં રાજકીય હડકંપ મચી ગયો હતો. આ સાથે જ અનેક પ્રકારના તર્ક વિતર્કો પણ શરૂ થયાં હતા.

બોટાદઃ ગુરુવારે બોટાદના ગઢડામાં એક સાથે 18 ધારાસભ્યોએ ધામા નાખતાં રાજકીય હડકંપ મચી ગયો હતો. આ સાથે જ અનેક પ્રકારના તર્ક વિતર્કો પણ શરૂ થયાં હતા. મળતી માહિતી મુજબ આગામી સમયમાં આવી રહેલી રાજ્યસભાની ચૂંટણી પૂર્વે ધારાસભ્યોને સુરક્ષિત રાખવા અને મતદાન પહેલાની જોડ-તોડની ચિંતાજનક પરિસ્થિતિથી બચવા માટે ધારાસભ્યોને અહીંયા લાવવામાં આવ્યા છે.

ગઢડાના સામાકાંઠા વિસ્તારમાં આવેલા એક ફાર્મ હાઉસમાં વિરોધ પક્ષના નેતા પરેશ ધાનાણી, લલિત વસોયા, શક્તિસિંહ ગોહિલ સહિતના ગુજરાતના 18 જેટલા ધારાસભ્યને લાવવામાં આવ્યા હતા. ધારાસભ્યોના આવવા અંગે પોલીસને જાણ થતાં બોટાદ જિલ્લા પોલીસ વડા સહિત પોલીસ કાફલો ગઢડા ખાતે દોડી આવ્યો હતો.

કોંગ્રેસના 18 ધારાસભ્યોના ગઢડાના ફાર્મ હાઉસમાં ધામાં

મળતી માહિતી મુજબ, આ તમામ ધારાસભ્યોને 19 જૂનના રોજ યોજાનારી રાજ્યસભાની ચૂંટણી પૂર્વે વિવિધ જગ્યાઓ ઉપર સ્થળાંતરિત કરવામાં આવશે.

આ અંગે ગઢડા શહેર કોંગ્રેસ પ્રમુખ પ્રતાપ છૈયાએ જણાવ્યું કે, ખાલી પડેલી ગઢડાની બેઠક પર પેટા ચૂંટણી યોજાવા અંગે બેઠકનું આયોજન કરવામાં આવ્યું હતું, પરંતુ હકીકત એ પણ છે કે, કોંગ્રેસના 66 ધારાસભ્યો પૈકી આગામી રાજ્યસભાની ચૂંટણી પૂર્વે એક પણ ધારાસભ્ય ભાજપની આંગળી ન પકડે તેની સંપૂર્ણપણે તકેદારી સાથે સુરક્ષિત સ્થાનની પસંદગી થઇ રહી છે.