જિલ્લામાં સાડા ચાર લાખ હેક્ટર જમીન વાવેતરમાં દર વર્ષે ૪ લાખ ૨૦ હજાર હેક્ટરથી વધુ જમીનમાં ખેતી થતી હોય છે. ચોમાસા આવવાના હવે ૧૫ દિવસ બાકી છે, ત્યારે ખેડૂતોએ ખેડ કરવાનો પ્રારંભ કરી દીધો છે. ખેતરમાં ખેડૂતો આજે ટ્રેક્ટર કે બળદ ભાડે લાવીને પણ ખેડ કરી રહ્યા છે. ખેડૂતો દ્વારા પ્રથમ ખેતીના તબક્કાનો પ્રારંભ કરી દેવામાં આવ્યો છે.
આ અંગે ખેડૂતોનું માનવું છે કે, આ વર્ષે વરસાદ દગો આપશે તો પરિસ્થિતિ વિકટ બની જશે. હાલ કુવામાં પાણી નથીં અને પશુ માટે ઘાસચારો પણ રહ્યો નથી. રોજગારીના બીજા સ્ત્રોત છે નહિ, ત્યારે હાલ ફરી ખેડૂતે કુદરત પર વિશ્વાસ મુકીને જુગાર રમ્યો છે કે વરસાદ સારો થશે. પરંતુ હાલ ખેડ કરી રહેલા ખેડૂતને ચિંતા છે કે, પૌરાણિક રીતે વરસાદ કેવો રેહશે તે જોવાની પદ્ધતિમાં વરસાદ મોડો થવાના એંધાણ વર્તાઈ રહ્યા છે.
કુંભાર દ્વારા બનાવવામાં આવતા ચાર વાસણમાં પાણી ભરવામાં આવે છે, આ વાસણ ચોમાસાના ચાર મહિના પ્રમાણે હોઈ છે. જેમાં જેઠ મહિનાના વાસણમાં ઓછું પાણી ભરાયું હોવાથી ખેડૂતને ચિંતા છે કે, જેઠ મહિનાના અંતમાં વરસાદ થાય અથવા તો ન પણ થાય. જો કે, હાલ તેમને ઉધાર પૈસા લાવીને પણ તૈયારી કરી દીધી છે.
ભાવનગરમાં ખેડૂતોએ ખેતીના પ્રથમ તબક્કાનો કર્યો શુભારંભ ભાવનગરમાં સૌથી વધુ વાવેતર કપાસ અને મગફળીનું થાય છે, ત્યારે ખેડ કરતા ખેડૂતોને પ્રથમ ટ્રેક્ટર અને બળદ હોય તો તેના ભાડાનો ખર્ચો કરવો પડે છે અને પછી કાળી મજુરીથી પરસેવો પાડવો પડે છે. ખેડૂતો માટે ખુશ ખબર એ છે કે, આ વર્ષે બિયારણમાં કોઈ ભાવ વધારો થયો નથી. જેથી કપાસન ભાવ ૭૩૦ના ૭૨૦ થયા છે તેમ મગફળીના ભાવમાં પણ વધારો નહી હોવાનું વેપારીઓ જણાવી રહ્યાં છે.
વેપારીઓએ જણાવ્યું હતું કે, ખેડૂતને બિયારણ કે ખાતર કોઈ ઉધારમાં આપતું નથી અને ગત વર્ષ નબળું હોવાથી ખેડૂતો પાસે પૈસા નથી. તેમ છતા ખેડૂતો ઉધાર-વ્યાજ પર પૈસા લાવીને હાલમાં બિયારણ અને ખાતર ખરીદી ધીરે ધીરે કરી રહ્યા છે. સરકાર દ્વારા ખેડૂતોને બિયારણ કે ખાતરને પગલે એવી કોઈ સહાય કે ધિરાણ મળતું નથી કે તેઓ પોતાની ખેતી કરી શકે.
ભાવનગરમાં આમ પણ ખેડૂતો ભાવના પગલે તૂટેલા છે અને બાકીમાં કુદરતના માર્યા છે. ત્યારે ફરી એક વખત જુગાર કુદરત પર વિશ્વાસ મુકીને ખેડૂત રમવા જઈ રહ્યા છે કે આખરે આ વખતે તેની જીત થશે અને સારો પાક મેળવીને પોતાના પેટ માટે કશું કરી શકશે. ત્યારે જોવાનું એ રહ્યું કે કાળી મજુરી કરતા ખેડૂતને આર્થિક સહાય માટે સરકાર આવશે કે માત્ર વાતું કરીને છૂટી જશે.
