ભાવનગરના ST બસ સ્ટેન્ડનું ખાતમુહૂર્ત કરશે CM વિજ્ય રુપાણી

ભાવનગર : રાજયના તત્કાલીન મુખ્યપ્રધાન નરેન્દ્ર મોદીના કાર્યકાળ દરમિયાન ભાવનગરના ST ડેપોને આધુનિક બનાવવાની જાહેરાત થયા બાદ નાલંદાનું એક દસકા બાદ ડેપોના આધુનિકીકરણનું મુહૂર્ત આવ્યું છે. આગામી તારીખ 22 ના રોજ મુખ્યપ્રધાન વિજય રૂપાણીના હસ્તે ભાવનગર ST ડેપો ખાતે આકાર પામનાર અદ્યતન બસ સ્ટેન્ડની ખાતમુર્હત વિધિ યોજાશે.

રાજ્યના અન્ય મહાનગરોની સરખામણીએ ભાવનગરને પણ વિકાસની દિશામાં સતત વેગવંતુ બનાવવા માટે રાજ્ય સરકાર દ્વારા તત્કાલીન સમયે વ્યાપક જાહેરાતો કરવામાં આવે છે. પરંતુ તેનો સચોટ અમલ સમયસર ન થવાને કારણે હાલ ભાવનગરના શહેરીજનો અને જિલ્લાના નાગરિકોને ભારે યાતના ભોગવવાનો વારો આવ્યો છે.

આવી ઘટના રાજ્યના તત્કાલિન મુખ્યપ્રધાન અને વડાપ્રધાન નરેન્દ્ર મોદીના કાર્યકાળ દરમિયાન બની હતી. રાજ્યના તત્કાલીન મુખ્યપ્રધાન નરેન્દ્ર મોદી અને એ સમયના પરિવહન મંત્રી વજુભાઇ વાળાએ ભાવનગરના ST ડેપો ST બસ સ્ટેન્ડને આધુનિક બનાવવાની જાહેરાત કરી હતી. આ જાહેરાતને અંદાજે 10 વર્ષથી વધુનો સમય વિત્યા બાદ ગત વિધાનસભા ચૂંટણી પૂર્વે રાજ્યના તત્કાલીન મુખ્ય પ્રધાન આનંદીબેન પટેલે ભાવનગર ST બસ ડેપો ખાતે જ તૈયાર થનાર ભાવનગરના અદ્યતન ST બસ સ્ટેન્ડના સ્થલ પર નાળિયેર નાખી સંતોષ માન્યો હતો. પરંતુ હવે ભાવનગરને ST બસ સ્ટેન્ડને અદ્યતન બનાવવાનું મુહૂર્ત આવ્યુ છે.

આગામી તારીખ 22 જૂનના રોજ રાજ્યના મુખ્યપ્રધાન વિજય રૂપાણીના હસ્તે ભાવનગરના ST બસ સ્ટેન્ડની ખાતમુહૂર્ત વિધિ યોજાશે. તેમજ રાજ્યના મુખ્યપ્રધાન વિજય રૂપાણીના હસ્તે ૧૦૦થી વધુ બસનો લોકાર્પણ સમારોહ યોજાશે.

સરકારના વાહન વ્યવહાર નિગમના જણાવ્યા અનુસાર આગામી બે વર્ષમાં ભાવનગર ખાતે અદ્યતન બસ સ્ટેન્ડ આકાર પામશે. જો કે રાજ્ય સરકારે ભાવનગરના અદ્યતન બસ સ્ટેન્ડ ફાળવવાની કરેલી જાહેરાતમાં જેટલા વર્ષો લાગ્યા તેટલા ભાવનગર અને અદ્યતન બસ સ્ટેન્ડ બનાવવામાં ન લાગે તેવી પણ લોકો માગ કરી રહ્યા છે.