બનાસકાંઠા: વડગામ તાલુકામાં ગત 4 માસથી તાલુકા વિકાસ અધિકારીની પોસ્ટ ખાલી છે. આ ઉપરાંત 1.5 મહિનાથી મામલતદારની પોસ્ટ પણ ખાલી છે. જેથી વડગામ તાલુકાની પ્રજામાં ભારે રોષ જોવા મળે છે. આ સાથે જ ભાજપની સંવેદનશીલ સરકારની વડગામ પત્યેની સંવેદના ઉપર પણ સવાલ ઉઠે છે. જેથી વડગામ તાલુકાના લોકો તાત્કાલિક કાયમી અધિકારીઓની નિમણૂક કરવાની માગ કરી રહ્યા છે.
વડગામ તાલુકામાં 4 માસ અગાઉ વિવાદાસ્પદ TDOની બદલી થયા બાદ તેમજ 1.5 માસ અગાઉ વય નિવૃત થયેલ મામલતદારની મહત્વની પોસ્ટ ભરવામાં વિલંબ થતાં તાલુકાની પ્રજામાં ભારે રોષ જોવા મળી રહ્યો છે. સમગ્ર દેશમાં કોવિડ-1 મહામારીને લઈ લોકોમાં ભારે દહેશતનો માહોલ છે, ત્યારે આવી ગંભીર સમસ્યા વચ્ચે વડગામ તાલુકામાં 4-4 માસથી TDO અને 1.5 માસથી મામલતદારની કાયમી નિમણૂક નહીં થતાં તાલુકાના લોકોમાં ભારે નારાજગી પ્રવર્તી છે.
અધિકારીઓની નિમણૂક નહીં થતા લોકોના અટવાઇ પડેલા કામમાં મુશ્કેલી પડી રહી છે, ત્યારે આ મહામારીમાં ઇન્ચાર્જ અધિકારીઓ અઠવાડિયામાં 1 અથવા 2 દિવસ તાલુકાની ઊડતી મુલાકાત લઈ રવાના થઈ જતાં હોવાની બુમરાડ ઉઠી છે. જેને લઈ લોકો સાહેબની રાહ જોતા કલાકો સુધી ઓફિસ આગળ બેસી રહે છે અને અંતે સાહેબ ન મળતા ધક્કા ખાઇને પરત ફરે છે. જેથી લોકો કાયમી ધોરણે TDO અને મામલતદારની પોસ્ટ ભરવા માટે માગ કરી રહ્યા છે.